ЕУ сака повеќе да се фокусира на менталното здравје на населението

Земјите членки на ЕУ сакаат да водат поголема грижа за менталното здравје на своите граѓани. Земјите се согласија да обезбедат пристап до навремена, ефективна и безбедна грижа за менталното здравје, се вели во соопштението објавено денеска на состанокот на министрите за здравство на ЕУ во Брисел.

Податоците на ЕУ покажуваат дека речиси секој втор Европеец имал емоционален или психосоцијален проблем минатата година.

Кризите како што се пандемијата на коронавирус, руската агресија врз Украина, климатските промени и порастот на цените на храната и енергијата дополнително ја влошија ситуацијата, особено кај децата и младите.

Во Германија, на пример, засегнатите понекогаш чекаат многу долго за помош за ментални здравствени проблеми.

Пред една година, Сојузната комора на психотерапевти, повикувајќи се на податоци од Националната асоцијација на лекари за законско здравствено осигурување од 2019 година, објави дека просечното време на чекање од првата консултација до почетокот на терапијата е 142,4 дена.