Жена отишла на одмор на Крит и завршила во кома: Мистериозна болест ја погодила – лекарите се борат за нејзиниот живот
Дона Џоблинг (57) од Хал, Велика Британија, е во критична состојба во болница на Крит откако се заразила со легионерска болест додека била на одмор.
Таа била на одмор со сопругот и пријателите кога одеднаш се разболела. Набргу потоа, итно била однесена во болница во Ираклион , каде што лекарите ја ставиле во индуцирана кома.
Одморот што започна опуштен и пријатен за Дона и нејзиниот сопруг Сидни беше прекинат кога таа почна да се чувствува лошо. Набрзо доби сериозна респираторна инфекција која брзо напредуваше, па лекарите мораа да ја седат и да ја стават на вентилатор.
Легионерска болест, инфекција која е опасна по живот
Според нејзината внука Клер, последователните тестови потврдиле дека Дона била заразена со бактеријата Legionella pneumophila, предизвикувачкиот агенс на Легионерската болест, ретка, но потенцијално фатална инфекција на белите дробови. Болеста предизвикала пневмонија и синдром на тежок респираторен дистрес.
Оваа инфекција е опишана како сериозна и опасна по живот, а најчесто се пренесува преку вдишување на контаминирани капки вода од системи како што се клима уреди, тушеви или џакузи.
Сидни, сопругот на Дона и поранешен полицаец, останал покрај неа цело време. Клер веднаш отпатувала на Крит кога дознала за состојбата на нејзината тетка, но морала накратко да се врати во Велика Британија за да ги собере потребните документи за осигурување. Таа е подготвена да се врати на Крит штом ќе биде комплетирана документацијата.
– Неизвесно е дали ќе преживее. Сите сме во шок и се молиме за неа. Таа е стабилна, но под постојан медицински надзор. Тешко ни е што не сме цело време околу неа – рекла Клер, која ја опишува Дона како личност која била како мајка за сите.
Семејството со тага се сеќава на минатите заеднички одмори во Грција, место кое го сметале за свој втор дом.
– Беа прекрасни моменти, секогаш уживавме во храната, сонцето и заедништвото – додава Клер.
Семејството Мејсон, пријатели кои патувале со нив, се вратиле во Англија на 12 јуни. Паула Мејсон, која била дел од патувањето, опишала како одморот започнал среќно, но се превртел наопаку преку ноќ.
– Уживавме, многу шетавме и сè беше прекрасно. А потоа Дона одеднаш се разболе. Има и други здравствени проблеми, но никој не очекуваше нешто вакво.
Иако сè уште не е познато како се случила инфекцијата, туристичката агенција, преку која е купен аранжманот, веднаш презеде мерки. Сите гости кои престојувале во истиот хотел биле преместени, а оние кои планирале патување во наредниот период биле информирани за алтернативни решенија. Дополнително, биле контактирани и сите кои неодамна се вратиле од тој хотел, со цел да бидат предупредени за симптомите на болеста, пишува „ croniclelive “.
Претставниците на агенцијата изјавија дека многу им е жал за сè и дека остануваат во контакт со семејството Џоблинг, обезбедувајќи им секаква достапна помош. Тие исто така потврдија дека хотелот соработува со локалните здравствени власти за да го испита потенцијалниот извор на инфекцијата.
