ЗИМА БЕЗ СНЕГ: Недостигот на дожд ги загрижува земјоделците

 Состојбата со недостигот на дожд, особено снег, како и невообичаените температури за средината на зимската сезона, негативно се одразува на сите земјоделски култури, велат агрономите. Агрономот Весна Севдинска вели дека земјоделството воопшто и житните култури особено ќе има повеќе последици од релативно топлото време и без снег.

 „Во јануари мора да имаме снег затоа што ако немаме снег нема да имаме ниту вода, тоа потоа ќе се одрази на есенските култури и на сите други култури. Покрај снег, потребни се и температури под нулата, во спротивно ќе се појават напаѓачи кои ќе ги нападнат зрната“, објасни Севдинска. Од друга страна, од Центарот за климатски промени велат дека голем дел од зимските центри во Европа зимава се соочуваат со недостиг од снег.

Според нив, пролетните температури во средината на јануари се поволни за краткорочен период поради енергетската криза, но на подолг рок тоа ќе донесе сериозни последици. Високите температури и недостатокот на снежни врнежи ќе имаат драматично влијание врз глобалната хидролошка состојба.

„Проблемите се веќе видливи. Нашите акумулации се речиси на границата на критичните висини. Во Албанија, каде хидропотенцијалот сочинува повеќе од 90% од вкупното производство на електрична енергија, се појави сериозен недостиг на електрична енергија кој не можеше да се обезбеди од други извори бидејќи ги немаше, па земјата беше принудена да се снабдува од увоз. Сега со недостаток на снежни врнежи и топло време, се поставува прашањето дали сепак треба да ја сметаме водата како обновлив извор на енергија и како да ја користиме за производство на енергија во иднина бидејќи секогаш има повеќе недостаток на вода. Ова е причина и за забраната за изградба на мали хидроцентрали кои би влијаеле на спуштање на водостојот во реките.