ИЗРАЕЛ ЗАПОЧНУВА НАПАД ВРЗ ОВОЈ ОГРОМЕН КОМПЛЕКС – Тие се архитекти на овој “пекол“ што го користи Хамас од 2007 година !?

Палестинската болница „Ал-Шифа“ во градот Газа е најголемиот морален предизвик на Израел во војната против Хамас и неговите злосторства, пишува либералниот израелски весник Haaretz пред најавеното израелско заземање на таа болница, најголемата во Појасот Газа, каде, се верува, се наоѓа седиштето на лидерите на Хамас.

Според Израел, од почетокот на војната, се акумулирани докази дека Хамас ја користи „Ал-Шифа“ како штит за својот штаб, дека тие чуваат залихи оружје во тунелите под болницата и дека дел од електричната енергија за болницата е пренасочена до нивното седиште.

Над земја, сепак, сцените се многу различни. Внатрешноста на комплексот е исполнета со цивили и повредени, а меѓу фотографиите кои пристигнуваат од болничките одделенија се и оние на новороденчиња покрај исклучените инкубатори. Израелската Армија ја опколи болницата околу која продолжуваат борбите. Неколку бебиња и цивили наводно загинале поради недостиг на гориво. Израелската Армија објави дека во неделата испратила 300 литри гориво во болницата, но здравствените работници на „Ал-Шифа“ одговориле дека потегот е смешен и понижувачки.

Директорот на болницата вели дека израелските тврдења за болницата како фронт на Хамас се „невистинити“. Израелските тврдења и палестинските противтужби не можат да се проверат, но странските медиуми јавуваат дека доказите презентирани од ИДФ не се целосно доверливи. Невозможно е со сигурност да се каже кој ја кажува вистината.

„Ал-Шифа“ не се споменува за првпат како голем фронт за Хамас. Оваа болница беше во центарот на вниманието и за време на претходните големи конфликти меѓу Израел и Појасот Газа. Меѓутоа, бомбардирањето или онеспособувањето на болница, и тоа среде војна, е црвена линија што ИДФ не ја премина.

Убиството на повеќе од илјада израелски цивили во јужен Израел – во напад на Хамас без преседан – може да биде пресвртница. ИДФ очигледно нема намера да ја повтори грешката со завршувањето на Хамас, велат аналитичарите. Поранешниот израелски службеник за национална безбедност, Чак Фрајлих, вели за New York Times дека болниците ќе бидат опколени и луѓето ќе бидат под притисок да излезат надвор. 

„Не верувам дека Израел ќе тргне директно против цивилите, но болницата, или барем нејзиното подземје, ќе мора да се исчисти“, коментира Чак Фрајлих. 

Ова, смета тој, е единствениот начин да се стави крај на владеењето на Хамас во Појасот Газа.

„Сцената и последиците нема да бидат добри“, признава тој.

Но, фотографиите на страдање доаѓаат од опколената палестинска територија повеќе од еден месец и веќе го поткопаа ставот на Запад, кој првично беше поволен за Израел. Поради бруталните злосторства извршени од Хамас, симпатиите беа на израелската страна, но во меѓувреме ситуацијата се промени, а со објавување шокантни видеа – Палестинците бараат сочувство од светот. Арапските држави се закануваат со радикализација поради најавите за влез во „Ал-Шифа“, а на Запад секојдневно има масовни протести во знак на солидарност со Палестинците. Најавите за бомбардирањето на болницата се точка на дипломатски конфликт со Израел.

„Бомбардирањето болница се смета за екстремен чин и целта мора да биде јасна и праведна“, коментира за Haaretz, Идит Шафран Гитлман, од Институтот за национална безбедност на Универзитетот во Тел Авив.

„Војната се води на три фронта. На бојното поле, дома и на меѓународниот фронт. Интересите понекогаш се спротивставени. Понекогаш напредокот на еден фронт може да предизвика огромна штета на меѓународниот фронт. Мораме постојано да ги балансираме тие интереси“, тврди Идит Шафран Гитлман.

Сепак, се чини дека ИДФ мисли дека овојпат треба да ја преземе болницата. Доказите што се објавени, оценуваат и аналитичарите на New York Times, не докажуваат без сомнение дека под болницата има комплекс на Хамас, како што тврди Израел. Сепак, осум сегашни и поранешни израелски високи функционери го потврдија тоа анонимно за американскиот весник. Согласни се и американските осигурителни компании.

Израелските власти тврдат дека најголемиот дел од комплексот го изградил Израел кога владеел со Појасот Газа, а две години по повлекувањето на Израел, уште во 2007 година, Хамас почнал да ја користи болницата како штит.

Отпрвин, Хамас ископале дополнителни простори покрај постојните подрумски простории, а потоа заминале подлабоко со додавање подземни подови и поврзување на овие коридори со мрежа од тунели под Појасот Газа. Поранешен функционер на Шин Бет изјавил за New York Times дека може да има неколку стотици луѓе во подземните простори под болницата.

Американските претставници со кои разговараше споменатиот весник веруваат во вистинитоста на израелските докази. Дека нападот е неизбежен говори и фактот што некои странски земји веќе почнаа да испраќаат се што е потребно за полските болници.

„Ал-Шифа“ не е само болница каде што 60-70 отсто од лекувањето во Појасот Газа се одвиваше до последната војна, пишува Haaretz. Сега е најголемиот бегалски камп во Појасот Газа. Илјадници луѓе се собраа во таа болница, кои живеат во ходниците, чекалните и шаторите околу зградата. Според информации од болница под контрола на Хамас, има осум илјади бегалци. Портпаролот на здравствените власти во Појасот Газа под контрола на Хамас изјавил дека околу стотина тела скапуваат по ходниците на болницата, немаат храна и вода, а Израел ги бомбардира сите што ќе ја напуштат болницата.

Станува збор за голем комплекс во кој секој месец доаѓале арапски лекари од Израел со своите колеги за да направат меѓу 30 и 50 операции. Декорацијата и опремата се на ниво на 70-тите години по западни стандарди, пишува New York Times. Секојдневно има информации за нехуманите услови за работа на докторите, од кои пред војната ги имало околу 560, а сега ги има само околу 200.

Според болнички извори, околу 130 медицински лица се убиени во тековниот конфликт, а персоналот се справува со ранети или мртви членови на семејството. Се пишуваше за дезинфекции со оцет, живи ампутации, предвремени породувања и проблеми со предвремено родени бебиња и новороденчиња.