ИОМ: Светот официјално влезе во ерата на климатска миграција

– Генералната директорка на Меѓународната организација за миграција (ИОМ) повика на итни решенија за справување со климатските промени и предизвиците на човековата мобилност бидејќи светот веќе влегол во „ерата на климатска миграција“.

„Начините за решавање на врската меѓу климатските промени и човечката мобилност на континентално ниво се итни“, рече Ејми Поуп.

Повикот за акција доаѓа пред Африканскиот самит за клима во Најроби кој ќе се одржи од 4 до 6 септември.

Самитот е најголемиот собир на африкански шефови на држави, министри, агенции на ОН, хуманитарни и развојни партнери, приватниот сектор и младите во историјата на континентот, се вели во соопштението на ИОМ.

„Африканските земји се меѓу најранливите на влијанијата на климатските промени, кои ги доживуваат страшните влијанија на климатската криза, како сушата, поплавите, екстремните временски температури, растот на нивото на морето“, се вели во соопштението.

Повеќе од 7,5 милиони внатрешни раселувања поради катастрофи се регистрирани на континентот во 2022 година, според извештајот на Центарот за следење на внатрешното раселување со седиште во Женева.

Без акционен план за климата се стравува дека до 105 милиони луѓе ќе станат внатрешни мигранти до 2023 година само во Африка, се проценува во извештајот на Светската банка од 2021 година.

Самитот се одржува пред Конференцијата КОП28 закажана за декември во Обединетите Арапски Емирати „за обединување на африканскиот континент кон договор за влијанието на климатските промени врз човековата мобилност“, се вели во соопштението.

Поуп беше избрана во мај за генерална директорка на ИОМ, ќе ја преземе функцијата на 1 октомври и ќе раководи со организацијата пет години.

Поуп беше висока советничка за миграција на американскиот претседател Џо Бајден во 2021 година.