Иран тврди дека добил огромна количина доверливи израелски документи

Иранската разузнавачка служба добила голема количина високо доверливи стратешки документи што му припаѓаат на Израел, вклучувајќи материјал поврзан со нуклеарните постројки и воените проекти на земјата, објавија иранските државни медиуми во саботата.

ИРНА соопшти дека Техеран примил „огромен број стратешки документи со посебна чувствителност“ поврзани со Израел. Меѓу досиејата имало „илјадници документи во врска со израелските нуклеарни објекти и проекти поврзани со окупацијата“.

Иако точното време на аквизицијата не е прецизирано, извештајот укажува дека тоа се случило пред некое време, но акцијата била чувана во тајност поради потребата од безбеден пренос на податоци во Иран, пренесува „Анадолија“ .

„Големината на документите и логистичките предизвици за безбедно преместување на целиот товар на безбедни локации во Иран бараа целосна доверливост за време на операцијата“, соопшти радиодифузерот.

Според извештајот, целата колекција документи успешно стигнала до „одредени безбедни локации“ во Иран.

Количината на информации, наводно, е толку обемна што самото разгледување на документите, вклучувајќи ги фотографиите и придружните видеа, ќе одземе значително време.

Иако иранските власти не соопштија како се добиени документите, ниту дали собирањето на податоци се случило дигитално или физички, веста веројатно ќе ги ескалира веќе зголемените тензии меѓу Техеран и Тел Авив, со оглед на тоа што откритието доаѓа во услови на растечко непријателство меѓу двата долгогодишни соперници.

Израел сè уште официјално не одговори на тврдењата на Иран.