Италија: Владата ќе прогласи состојба на катастрофа за поплавените подрачја

Меѓу главните нешта на агендата во Италија сè уште се катастрофалните поплави како последица на поројните дождови и излевањето на реките на почетокот од оваа недела, во кои има човечки и материјални загуби.

Џилберто Пикето, министерот за животна средина и енергетска безбедност, во изјава за италијански радиоканал рече дека ќе воведат состојба на катастрофа во регионот Емилија Ромања, кој е сериозно погоден од поплавите.

Стефано Боначини, регионалниот раководител на областа Емилија Ромања, во интервју за еден телевизиски канал рече дека малку нешто може да се стори кога количеството на шестмесечен дожд ќе падне во период од 36 часа и истакна дека штетата во регионот е „неколку милијарди евра“.

Во меѓувреме, италијанските медиуми објавија дека бројот на загинати во катастрофалните поплави се зголемил на 9.

Бројката на раселените лица поради поплавата надминува 20.000.

Активностите на противпожарните тимови и екипите на цивилната одбрана за спасување на настраданите од поплавата продолжиле и во текот на ноќта.

Поројните дождови предизвикаа излевање на 23 реки во регионот, на 280 локации имало одрони, 400 патишта се затворени за сообраќај, а 50.000 луѓе останале без електрична енергија.

Од друга страна, италијанското Здружение на земјоделци (Coldiretti) објави дека под вода се 5.000 фарми кои се занимаваат со земјоделско производство.

Во некои градови како што е Луго, нивото на водата достигнало 1 метар.

Во тек се активности за отворање на патиштата во регионот, кои се затворени за сообраќај бидејќи се под вода или се оштетени од свлечишта.

ТРТ БАЛКАН