КАСЕТНА МУНИЦИЈА, РАКЕТИ, ТЕНКОВИ… САД и испраќаат на Украина нова рунда оружје во вредност од 325 милиони долари: Еве што се има на списокот

Соединетите Американски Држави (САД) денес објавија детали за новиот пакет воена помош за Украина од 325 милиони долари.

Овој пакет вклучува, меѓу другото, касетна муниција, против-тенковско оружје и ракети за системите за воздушна одбрана HIMARS, соопшти американската администрација.

„Отпорноста, храброста и одлучноста на Украина го инспирираа светот и ги поттикнаа напорите на САД и на светот да и помогнат да се одбрани и да ја обезбеди својата иднина. По најавата на претседателот Џо Бајден за нов пакет безбедносна помош за Украина, во согласност со делегацијата на овластувањата на претседателот, одобрувам дополнителна безбедносна помош за Украина, која ќе обезбеди американско оружје и опрема во вредност од 128 милиони долари од залихите на Министерството за одбрана. Пентагон ќе обезбеди и оружје и опрема во вредност од 197 милиони, како дел од претходно договорените транши“, најави американскиот државен секретар Ентони Блинкен.

Во соопштението на Стејт департментот се вели дека оружјето и опремата вклучуваат дополнителна против-воздушна муниција што ќе помогне да се зајакне воздушната одбрана на Украина од воздушните напади од Русија сега и следната зима, кога Москва најверојатно ќе ги обнови нападите врз виталната инфраструктура на Украина.

Најавено е дека пакетот помош содржи артилерија и против-тенковска муниција, како и касетна муниција, што, како што е наведено, дополнително ќе го подобри капацитетот на Украина да продолжи со контраофанзивата против руските сили.

Во соопштението се наведува и дека САД и Украина воспоставиле партнерство кое е посилно од кога било и дека во изминатата година, украинските сили повторно зазеле повеќе од 50 отсто од територијата окупирана од руските сили од февруари 2022 година.

Пентагон во соопштение соопшти дека испраќа дополнителен пакет безбедносна помош за да се задоволат виталните безбедносни и одбранбени потреби на Украина.

Беше посочено дека ова е четириесет и седма транша опрема што администрацијата на Џо Бајден ја обезбеди од американските воени залихи за Украина од август 2021 година.

Беше прецизирано дека овој пакет помош, вреден до 325 милиони долари, меѓу другото вклучува и ракети за против-воздушна одбрана AIM-9М, дополнителна муниција за мобилни ракетни системи HIMARS и системи за против-воздушна одбрана.

Новиот пакет вклучува против-оклопни системи Javelin и AT-4, уште 59 тактички возила, над 3 милиони парчиња муниција за мало оружје, резервни делови, опрема за одржување и друго, објави Пентагон.

Претседателот на САД, Џо Бајден, вчера разговараше со претседателот на Украина, Володимир Зеленски, во Белата куќа и најави дека САД остануваат посветени на поддршката на напорите на Киев да се одбрани од руската инвазија.