Кинезите градеа пат и открија мистериозна гробница: Мурал од 8 век прикажува русокос маж од Запад, а не е ни Александар Македонски ни Марко Поло!?

Сликите ја прикажуваат секојдневната работа за време на династијата Танг.

Кинеска гробница со добро сочувани и уникатни мурали од династијата Танг (618-907) е откриена во Таијуан, главниот град на провинцијата Шанкси, објави Ксинхуа. Гробницата од тули има една просторија, а насликана е со прикази на досега невидено секојдневие. Според експертите, на еден од нив е прикажан „западњак“, маж со руса коса.

Гробницата е откриена во 2018 година, кога започна изградбата на патишта, но археолошкиот институт на провинцијата Шанкси објави само фотографии и детали за неа. Според извештаите, во неа во 736 година бил погребан маж кој починал на 63-годишна возраст, а се верува дека таму била закопана и жена.

Портата, влезот, таванот, ѕидовите и постаментот на ковчегот се украсени со мурали, а во ходникот има и фигури на чувари.

Меѓу муралите, најмногу внимание на археолозите привлекоа два на различни ѕидови.

Една од нив прикажува работни сцени, вклучително и маж кој лупи жито со валјак, жена управува со камена мелница, маж кој меси тесто и жена која подига вода со древна кинеска направа. Друг мурал покажува жена во шарена облека, како и маж кој не е Хан со камшик и слики од коњи и камили, според Ксинхуа.

• Русокосиот што ги води камилите има различна облека. Со оглед на карактеристиките на неговото лице и облека, можеме да го идентификуваме како „западњак“, најверојатно од Согдијана во Централна Азија, изјави за LiveScience Виктор Ксионг, професор по историја на Западниот универзитет во Мичиген.

Тој не бил вклучен во ова откритие, но е експерт за периодот од кој потекнува мистериозната гробница.

• Најчеста тема на овие мурали се човечките фигури под дрвјата, што е традиција од династијата Хан. Овие мурали ни даваат досега невиден поглед на секојдневните обврски и работата за време на династијата Танг – рече Ксионг.

Династијата Танг ја замени династијата Суи и владееше со Кина од 618 до 907 година. По неа, земјата влезе во периодот на пет династии и десет кралства.

Согдијана била древна иранска цивилизација во областа на денешен Узбекистан, Таџикистан и Киргистан. Нејзините жители често тргувале меѓу Азија и Европа на Патот на свилата, кој процветал за време на династијата Танг.