Кинески производител на правосмукалки сака да го направи најбрзиот автомобил во светот
Кинеската компанија „Дрим Технолоџи“, која произведува правосмукалки и роботи, е решена не само да влезе на пазарот на автомобили, туку и да го произведе најбрзиот автомобил во светот.
Xiaomi, конкурентот на Apple во областа на паметните телефони, постигна успех во својот автомобилски бизнис, но тоа е само врвот на ледениот брег. Dreame Technology, кинеска компанија позната по производството на брзи електрични правосмукалки и роботи, сака да го „нападне“ легендарниот Bugatti Veyron.
Дрим објави дека до 2027 година ќе го произведат најбрзиот автомобил во светот користејќи ја истата технологија со која е развиен нивниот препознатлив мотор од 200.000 вртежи во минута. Тоа се големи зборови, особено кога доаѓаат од субјект кој нема апсолутно никакво искуство во производство на автомобили. Исто така, малку е иронично што еден новодојденец би го поставил Вејрон како репер, со оглед на тоа што Бугати не произвел нов Вејрон десет години, туку се фокусира на уште побрзи и помоќни модели.
Иако „Бугати“ нема да се откаже од своите мотори што трошат многу гориво во скоро време, „Дрим“ сака да ги привлече насловните страници благодарение на автомобил со целосно електричен погонски склоп.
„На секторот на луксузни автомобили му недостасува вистински интелигентен бренд на електрични хиперавтомобили. Додека традиционалните ултралуксузни брендови како Bugatti и Bentley бавно ја прифаќаат електрификацијата и интелигенцијата, Dreame ќе го редефинира што е ултралуксуз во следната автомобилска ера“, соопшти компанијата.
Нема информации колку моќен ќе биде автомобилот на Dreame, но едно е сигурно: ќе има вештачка интелигенција (ВИ) како придружник, која наводно ќе ги учи навиките на возачот и ќе се прилагодува на нив. Како и другите кинески електрични возила, претстојниот хиперавтомобил на Dreame, кој сè уште не е именуван, ќе биде дизајниран да се интегрира со паметниот телефон и паметниот дом на сопственикот.
Компанијата веќе собра тим од речиси 1.000 луѓе за проектот, а некои од вработените доаѓаат од автомобилската индустрија и секторот за паметни уреди.
Доколку планот на Дрим се оствари, компанијата ќе стане првиот производител на правосмукалки во светот што ќе изгради сериски автомобил. Тоа е повеќе отколку што може да се каже за Дајсон, кој се откажа од плановите за производство на електричен кросовер во 2019 година.
