Кога е најдобро време да се јаде јаболко?

Јаболката се богати со растителни влакна и антиоксиданси и можат значително да придонесат за здравјето на дигестивниот систем. Но, дали делот од денот кога ги јадеме може дополнително да ги зголеми нивните придобивки? Експертите за исхрана откриваат кога јаболкото има најголем ефект врз телото.

Наутро за добар почеток на денот

Јаболкото е одличен избор за почеток на денот бидејќи дава чувство на ситост и содржи малку калории. д-р Жаклин Вернарели, нутриционист епидемиолог, истакнува дека јаболката имаат низок гликемиски индекс и содржат хлорогена киселина, која помага во стабилизирање на шеќерот во крвта по оброкот.

„Јаболката се практична, нискокалорична храна богата со растителни влакна, витамини и антиоксиданси кои го поддржуваат здравјето на срцето, дигестивниот систем и имунолошкиот систем. Тие се исто така извор на антиинфламаторни соединенија, како што се витамин Ц и кверцетин“, објаснува Вернарели.

Иако едно јаболко нема чудесно да го забрза вашиот метаболизам, може нежно да го подобри вашето варење наутро, додава диететичарката Лорен Манакер.

Пред оброци – сојузник во контролата на апетитот

Јадењето јаболко еден или два часа пред главниот оброк може да помогне во контролата на телесната тежина. Јаболкото го поттикнува чувството на ситост и може да го намали внесот на калории за време на оброкот. Диететичарот Морган Вокер објаснува дека влакната во јаболкото ја забавуваат апсорпцијата на јаглехидратите, што помага да се одржи стабилно нивото на шеќер во крвта.

Едно јаболко со средна големина содржи околу 4 до 5 грама влакна, а редовниот внес на влакна е поврзан со помал ризик од срцеви заболувања и дијабетес тип 2.

Пред тренинг како природен извор на енергија

Јаболкото може да биде добар избор и пред вежбање. Некои луѓе сакаат да го јадат два до три часа пред вежбање, додека други претпочитаат помала ужина од неколку парчиња непосредно пред тренинг.

„Природните шеќери во јаболката обезбедуваат брза енергија, а влакната помагаат во одржувањето на стабилен шеќер во крвта“, вели регистрираниот диететичар Ешли Коф.

Cепак, луѓето кои се чувствителни на влакна треба да избегнуваат да јадат јаболко непосредно пред интензивен тренинг, забележува Манакер.

Со оброк или навечер, тоа е здрава алтернатива на слатките

Јаболко може да се додаде во појадок, ручек или вечера. Професорката по нутриционистички науки д-р Ан ВанБебер советува јаболката да се додаваат во овесна каша, мафини или да се сервираат како дел од лесна вечера.

Ако по вечерата посакувате нешто благо, јаболкото е поздрава опција за десерт. Може да се сервира со путер од јаткасти плодови или да се нароси со малку цимет за дополнителен вкус и чувство на ситост.

Јадете го кога ви одговара најмногу.

„Најдобро време да се јаде јаболко е кога е најголема веројатноста дека всушност ќе го јадете“, вели Манакер.

Некои луѓе претпочитаат да го јадат наутро, додека други уживаат во него попладне или навечер. Најважно е јаболкото да биде дел од балансирана исхрана.

Таа додава дека е корисно да се комбинира јаболко со путер од бадеми или кикирики, бидејќи здравите масти и протеините дополнително го забавуваат зголемувањето на шеќерот во крвта. Таа исто така препорачува јаболкото да се јаде со кора, бидејќи содржи дополнителни влакна и хранливи материи.

Јаболката се секогаш добар избор.

Јаболката се здрава храна што може да се вклучи во исхраната во кое било време од денот. Сепак, нивното јадење во одредено време може да донесе дополнителни придобивки. Јаболко пред тренинг може да ја зголеми енергијата, по вечерата може да задоволи желба за благо, а за појадок помага во варењето и дава чувство на ситост подолго време. Ако вашата цел е регулирање на телесната тежина, јаболко пред оброк може да биде корисна, нискокалорична алатка за контрола на апетитот.