КОНЕЧНО ДОБРИ ВЕСТИ ЗА СРБИНОТ! САД ја укинуваат мерката што го спречи Новак Ѓоковиќ да учествува на големите тениски турнири

На 11. мај, Соединетите Американски Држави (САД) ќе ја укинат мерката со која се бара од странските патници и работници во федералните институции да се вакцинираат против вирусот Ковид-19, објави во понеделникот Белата куќа.

Претставничкиот дом на САД во февруари гласаше за укинување на условот повеќето странски патници со авион да се вакцинираат против вирусот Ковид-19, едно од ретките преостанати ограничувања за патување ширум светот.

Администрацијата на Џо Бајден го укина задолжителниот негативен тест за вирусот Ковид-19 за странските патници со авион минатиот јуни, но ја задржа мерката на ЦДЦ со која се бара вакцинација за повеќето странски патници.

Правилата му оневозможија на српската тениска ѕвезда Новак Ѓоковиќ да учествува на некои американски турнири бидејќи не е вакциниран против Ковид-19, но наскоро ќе може слободно да влезе во САД и да игра на големите американски турнири како што е УС Опен.

Одделот за домашна безбедност во понеделникот објави дека ова барање се укинува и за странските државјани кои влегуваат во САД по копно или море.

Правилата наметнати од администрацијата на Џо Бајден во септември 2021 година, кои бараа вакцинација против Ковид-19 за околу 3,5 милиони вработени во федералните институции и изведувачи и им се закануваа со отпуштања или дисциплински мерки, не стапија на сила по серија судски пресуди.

Во март, Федералниот апелационен суд ја потврди одлуката за блокирање на спроведувањето на барањата за вакцинација на вработените.