Лежалките во Грција поскапуваат од ден во ден
Туристите често во Facebook групите споделуваат информации за цените на лежалките на најпопуларните дестинации меѓу Македонците, како што се Неа Пори, Паралија, Тасос, Лептокарија, Сарти и други.
Она што туристите во Грција особено го сакаат е што сè уште постои одреден број барови на плажа каде лежалките не се плаќаат – условот е само да купите пијалок.
Оваа појава полека „изумира“ на други туристички локации, но и во некои делови на Грција, каде цените на лежалките достигнуваат и неколку десетици евра. Меѓутоа, Грците сè уште, во поединечни летувалишта, се држат до ова „правило“.
„Пред некој ден некој праша за цените на лежалките и јас одговорив дека само треба да земеш пијалок како и досега, меѓутоа од денес има нова ситуација на Тасос. Дополнително се наплаќа, лежалката е 2,5 евра плус пијалок“, сподели една туристка во онлајн групите.
Веднаш следуваа стотици коментари.
„Сè зависи од место до место. Лани најдов плажа каде лежалките беа гратис со консумација во Лименас, но треба да се дојде што порано, околу 8-9 часот наутро кога има место“, „Јас моментално сум на Тасос во градот Лименас и лежалките се добиваат со пијалок“, „Ставрос, 4 евра, пијалак и користиш цел ден“, „Во Полихроно најевтино беа 20 евра, така што тоа е одлично“, се само некои од коментарите.
Од коментарите може да се види дека и понатаму е можно да се најдат бесплатни лежалки со пијалок во поединечни места во Грција.
Меѓутоа, доколку цените на лежалките се превисоки во местата каде летувате, треба да знаете едно правило.
Правило на плажите
Во Грција од минатата година важи правило за регулирање на уредените плажи, односно обезбедување јавен пристап, без потреба од плаќање лежалки.
Според тоа правило, 70 отсто од површината на плажата мора да остане достапна за јавноста. Тоа значи дека, ако не сакате да плаќате лежалки и чадори, можете да заземете одреден дел од плажата и да престојувате на пешкир, сламарник, столици или други лични реквизити за плажа.
Во анкетата што лани ја спроведе порталот b92.net, дури 52 отсто од луѓето гласале дека повеќе им одговара опцијата со користење пешкир и сламарник, наместо лежалки.
