Лидерите на ЕУ го повикаа Бајден да ја зголеми помошта за Украина пред доаѓањето на Трамп!
Лидерите на Европската унија апелираа до администрацијата во заминување на претседателот Џозеф Бајден да ја зголеми американската поддршка за Украина со цел што е можно повеќе да ја зајакне позицијата на Киев пред крајот на претседателскиот мандат во јануари, пишува „Блумберг“, повикувајќи се на извори.
Агенцијата забележува дека Трамп, кој ќе ја преземе функцијата на 20 јануари, изјавил дека ќе се заложи за договор меѓу Киев и Москва што е можно поскоро, што предизвика загриженост во Европа дека таквиот договор би бил неповолен за Украина и на крајот може да се консолидира придобивките што ги постигна Русија од почетокот на конфликтот во 2022 година.
Европските власти побараа од САД да ѝ дадат на Украина повеќе оружје и артилерија, да воведат дополнителни санкции за клучните руски приходи и да ја таргетираат „способноста на Москва да се здобие со забранети технологии што се користат во производството на оружје“, според извори „запознаени“ со ова прашање.
Многу европски барања беа од неформален карактер, забележува „Блумберг“. Американскиот државен секретар Ентони Блинкен отпатува во Брисел на 13 ноември за да ги увери сојузниците во НАТО и Европската унија дека САД ги засилуваат напорите да испратат ресурси во Украина пред инаугурацијата на новоизбраниот претседател.
Тој изјави дека ресурсите, вклучително и пари, муниција и оружје главно доаѓаат од пакетот вреден 61 милијарда долари, усвоен од американскиот Конгрес претходно оваа година. Тој додаде дека „секој долар со кој располагаме“ ќе биде брзо искористен.
Според извори на агенцијата, иако на Бајден му останува малку време да ги исполни барањата, САД веќе работат на усвојување нови санкции против руската нафтена флота и Северна Кореја, која испрати војници да и помогнат на Москва до крајот на ноември.
„Следните неколку недели ќе бидат клучни за ставање на Украина во силна позиција“, рече Марк Леонард, ко-основач и директор на тинк-тенк Европскиот совет за надворешни односи.
САД ветија дека ќе се погрижат сите пари со кои располагаат да бидат искористени пред Трамп да ја преземе функцијата.
Сепак, испораката на одредено оружје може да потрае неколку месеци дури и по завршувањето на мандатот на Бајден. Неколку лидери на ЕУ, исто така, инсистираа САД да и дозволат на Украина да користи западно оружје за да нападне воени цели во Русија.
Трамп постојано изјави дека може да го прекине руско-украинскиот конфликт за 24 часа, штом ќе влезе во Белата куќа или уште порано.
