Македонската царина заплени 1.158 фалсификувани часовници

Царинската управа објавува дека запленила 1.158 фалсификувани рачни часовници на граничниот премин „Богородица“.
Царинската управа додава дека до септември годинава на граничните премини се откриени 63 случаи на повреда на правата од интелектуална сопственост, при што се запленети речиси 78.000 производи со добро познати трговски марки.

„При проверка на стока пријавена за транзит на граничниот премин Богородица, запленети се вкупно 1.158 рачни часовници со заштитените трговски марки „Ролекс“, „Бос“, „Армани“ и „Томи Хилфигер“. Случајот е откриен од мобилна царинска екипа, која, поради сомневање, извршила детална проверка, при што пронашла часовници чија вредност, декларирана според фактурата од кинеска компанија, изнесувала 60.852 денари.

„Поради основано сомнение за повреда на правата од интелектуална сопственост, стоката е блокирана и е покрената постапка за утврдување на автентичноста на производите“, соопшти Царинската управа.