Медведев ги поддржа ставовите на Џеј-Ди Венс: „Времето на оваа Европа одамна помина“

Заменик-претседателот на рускиот Совет за безбедност Дмитриј Медведев изјави дека е целосно точно она што го кажа американскиот потпретседател Џеј-Ди Венс за Европа на Минхенската безбедносна конференција, оценувајќи дека Европа е слаба, непривлечна и дека веќе никому не му треба.

Тој оцени дека Европа ќе ги „проголта“ критиките на Венс искажани на конференцијата во Минхен, но дека ќе го мрази поради тоа.

„Овојпат, антируската кампања во Минхен во голема мера беше нарушена со многу провокативен говор на потпретседателот Венс. Сите очекуваа површни партнерски фрази упатени до Европа и коментари од американскиот претседател Доналд Трамп за ставање крај на украинскиот конфликт, но тој се побуни и им го кажа своето парче на Европејците кои целосно се изгубија во последните години“, рече Медведев.

Тој на социјалните мрежи напиша дека доколку Венс не беше висок американски функционер, Европејците поинаку ќе ја третираа изјавата, но дека во овој случај „ќе го проголтаа со омраза овој понижувачки прекор од висок партнер“.

Медведев додаде дека она што Венс го кажа за Европа е целосно точно, опишувајќи го американскиот потпретседател како „храбро момче“, но дека му недостига искуство за неговата сегашна улога.

„Времето за оваа Европа одамна помина. Таа е навистина слаба, непривлечна и практично никому повеќе не му треба освен на себе“, заклучи Медведев.

Зборувајќи на Минхенската безбедносна конференција, американскиот потпретседател Џеј-Ди Венс вчера изјави дека Европа минува низ криза што самата ја создава, а не Русија или Кина.

Како најзагрижувачки примери тој ги наведе поништувањето на изборните резултати во Романија и ризикот од слично сценарио во Германија.