Министерот Андоновски на средба со млади од ИТ секторот
Министерот за дигитална трансформација Стефан Андоновски денеска на првиот работен ден од мандатот на средба со млади од ИТ секторот порачал дека ќе работи на обезбедување услови за нивен развој и креирање иднина во државава.
– Првата официјална средба како министер за дигитална трансформација, ја почнувам заедно со младите. Сите напори и решенија треба да бидат во насока на обезбедување добри услови младите да се развиваат и да ја гледаат и својата иднина во Македонија, вели Андоновски во пишана изјава.
Истакнал дека реформите се во фокусот на новата Влада.
-Реформите во општеството и дигиталната трансформација се и главен акцент на новата Влада со која што ќе се овозможи и подобар стандард за живеење на младите и намалување на корупцијата, наведува Андоновски.
Како кадар на ВМРО-ДПМНЕ, Андоновски ја вршеше функцијата дополнителен заменик министер за информатичко општество и администрација во техничката влада од јануари до мај годинава. Од тој ресор со реорганизацијата на државната управа произлезе посебно Министерство за администрација.
