Мицкоски и Филипче денеска на средба во Владата

Премиерот Христијан Мицкоски и лидерот на опозициската СДСМ, Венко Филипче за денеска во 14 часот договорија средба во Владата. Во изјава за медиумите во Штип, Мицкоски искажа подготвеност за средба со Филипче, кој пак вчера повика на политички и општествен дијалог.

Филипче на прес-конференција рече дека по трагедијата во Кочани, граѓаните реагираа со револт и бес, системот не функционира како што треба, а за тоа вина, како што посочи, имаат сите политички партии. Областите каде што треба системски пристап, според Филипче се образование, здравство, правосудство, животна средина, партизација и политизација.

Премиерот Мицкоски, пак, кажа дека ова е сериозна тема за која се разговара.

„Доколку има план како што најавија, подготвен сум да го примам на средба да го образложи истиот, да го слушнеме планот бидејќи се сериозни времиња, јас сум сериозен човек, сериозни работи се во прашање и најмалку што треба да се прави е естрада на јавна сцена“, рече Мицкоски.