Мицкоски: Папата Франциско постојано ја изразуваше својата поддршка за Македонија

Претседателот на Владата на Република Македонија, Христијан Мицкоски, изрази сочувство за смртта на папата Франциско, нагласувајќи дека тој како духовен водач зад себе остава исклучително хуман, чесен и посветен белег во историјата на современиот свет.

„Неговата порака за мир, солидарност, грижа за најранливите и дијалог меѓу народите беше светлина за милиони луѓе, без разлика на вера или нација. Тој беше глас на совеста во време на глобални предизвици и неизмерен пример за хуманост и морална храброст’, напиша Мицкоски на својот официјален Фејсбук профил.

Премиерот додава дека неговите зборови отсекогаш биле охрабрувачки, а неговиот однос кон нашиот народ бил исполнет со топлина и почит.

„Од мое лично име, од името на Владата и граѓаните, изразувам најискрено сочувство до Ватикан, Католичката црква и сите верници кои денес тагуваат. Нему вечна слава и благодарност“, рече Мицкоски во своето сочувство до папата Франциско.