“НАУЧЕТЕ ЈА ЛЕКЦИЈАТА!“ – Американците вршат се поголем притисок врз Израел, пристигна сериозно предупредување: “Ризикувате стратешки пораз“
Додека се подготвуваат за целосна копнена инвазија на јужниот дел на Појасот Газа, Израел е под зголемен притисок од меѓународните партнери да обезбеди безбедна евакуација на цивилното население.
Претседателот на САД, Џо Бајден, и други високи американски функционери ги предупредија своите израелски колеги дека мора да го избегнат видот на масовно внатрешно раселување на цивили што следеше по израелското бомбардирање на северот на Појасот Газа.
Откако Хамас го нападна Израел на 7. октомври, приближно 1,8 милиони палестински цивили се насилно раселени од своите домови во Појасот Газа, речиси три четвртини од вкупното население на Појасот Газа. Во Појасот Газа досега беа убиени повеќе од 15.200 Палестинци, од кои 70 отсто се деца и жени.
Државниот секретар за одбрана на САД, Лојд Остин, го предупреди Израел дека ризикува „стратешки пораз“ доколку не успее да ги заштити палестинските цивили во Појасот Газа.
„Во борба како оваа, центарот на гравитација е цивилното население. И ако ги ставете во прегратките на непријателот, заменувате тактичка победа за стратешки пораз“, истакна Лојд Остин викендот, говорејќи на конференција за одбрана во Калифорнија.
Администрацијата на Џо Бајден го повика Израел да научи од лекциите на американската Армија во борбата против Исламската Држава во Ирак. Како и Хамас, ИСИС беше скриена меѓу цивилното население во густо населените урбани области.
„Меѓународната коалиција против ИСИС работеше напорно за да ги заштити цивилите и да создаде хуманитарни коридори, дури и за време на најтешките битки. Лекцијата не е дека можете да победите во урбаната војна без заштита на цивили. Лекцијата е дека можете да победите во урбаната војна само ако штитите цивили“, вели Лојд Остин.
Државниот секретар на САД, Ентони Блинкен, во петокот изјави дека израелските власти ги споделиле со него своите планови за тоа како планираат да ги заштитат цивилите во следната фаза од воените операции и порача дека САД внимателно ќе следат како се одвива ситуацијата на теренот.
Израелската Армија во саботата ги засили воздушните напади во јужниот дел на Појасот Газа и им нареди на жителите на некои погранични палестински градови да ги напуштат своите домови.
„Критично е Израел да го победи Хамас. Но, ако продолжат да убиваат толку многу цивили, тоа само ќе ги зајакне“, предупреди американскиот демократски конгресмен Сет Мултон, пренесува Financial Times.
За време на привремениот прекин на огнот меѓу Хамас и Израел, Хамас ослободи 84 жени и деца додека Израел ослободи околу 240 палестински жени и деца од своите затвори. Израелските одбранбени сили истакнуваат дека Хамас сè уште држи 136 заложници во Појасот Газа, од кои 17 жени и деца, а останатите се главно израелски војници и резервисти.
Владата на Велика Британија откри дека ќе спроведе воени летови за надзор над Појасот Газа за да помогне во операцијата за спасување заложници. Меѓу затворениците на Хамас има и британски државјани. Министерството за одбрана на Велика Британија додаде дека на Израел ќе му ги пренесе само информациите кои се суштински за спасување на заложниците.
