Научниците велат дека една активност го намалува ризикот од кардиоваскуларни заболувања
Блиските односи со семејството и пријателите се клучни не само за менталната благосостојба, туку и за здравјето на срцето. Ова го докажа новото истражување спроведено од австралискиот универзитет Монаш. Според студијата, силните социјални врски кои „овозможуваат дискусија за лични работи и проблеми“ може да го намалат ризикот од срцеви заболувања до 30 проценти.
Научниците шест години проучувале 9.936 здрави Австралијци на возраст над 70 години. Нивните наоди ја истакнуваат значајната улога што ја играат социјалните односи во кардиоваскуларното здравје. Оние кои биле во брак или партнерство имале помал ризик од кардиоваскуларни болести, а специфичните видови на социјални интеракции биле поврзани со уште поголема благосостојба.
Така, тие откриле дека социјалните врски значително влијаат на здравјето на срцето. За мажите кои одржуваат блиски врски со три до осум роднини на кои можат да се потпрат за помош, имаше 24 отсто намалување на ризикот од срцеви заболувања.
Уште позначајно, мажите кои имале ист број роднини со кои можеле да разговараат за лични работи го намалиле ризикот од срцеви заболувања за 30 проценти. Ова сугерира дека квалитетот на врските, а не само нивната количина, игра клучна улога во здравјето на срцето.
Што се однесува до жените, истражувањето ја истакна важноста на доживотните пријателства. Жените кои живееле со други имале 26 отсто помал ризик од срцеви заболувања во споредба со оние кои живеат сами. Дополнително, жените кои имале најмалку три пријателки со кои можеле да разговараат за лични работи го намалиле ризикот од срцеви заболувања за 29 проценти.
Резултатите се релевантни за сите, не само за луѓето постари од 70 години
Студијата исто така покажа дека природата на социјалните активности може да влијае на здравјето на срцето. Мажите кои се занимавале со конкурентни социјални активности, како што се играње шах и карти, го намалиле ризикот од срцеви заболувања за 18 проценти. Ова сугерира дека вклучувањето во социјални интеракции, без разлика дали преку семејно поврзување или конкурентно играње, може да има значителни придобивки за кардиоваскуларното здравје.
„Нашата студија покажа дека блиските женски пријателства се поврзани со помал ризик од нови случаи на срцеви заболувања. Ова може да има позитивен ефект врз кардиоваскуларното здравје“, изјави за New Atlas, Магистер по епидемиологија на јавното здравје и главен автор на студијата Ачамелех Бирхану Тешале.
Истражувачите истакнуваат дека овие резултати се релевантни за сите, не само за луѓето постари од 70 години.
,,Без оглед на возраста, доказите за придобивките од блиските пријатели и роднините за здравјето на срцето се јасни. Овој феномен може да се припише на позитивното влијание на споделувањето чувства со членовите на семејството, пријателите или соседите во промовирањето на чувствата на благосостојба и поврзаност“, заклучи Тешале.
