Научниците ја открија тајната на долговечноста? Истражувањето покажа фантастични резултати кои би го промениле општеството на подобро

Научниците од истражувачката агенција Арија, која е финансирана од британската влада со 800 милиони фунти, во рамките на нивниот проект ќе го истражат потенцијалот на кралиците во пчелните колонии за евентуално откривање на терапии кои би можеле да го продолжат човечкиот живот.

Кралиците, кои имаат идентична ДНК со пчелите работници , но сепак живеат многу подолго, долго време го привлекуваат вниманието на научниците кои се прашуваат дали можеби ја кријат тајната на долговечноста и плодноста.

Целта на амбициозниот научен проект е да се истражи биологијата на пчелите за да се утврди што им помага на матиците да преживеат со години и да бидат плодни, додека работниците живеат во најдобар случај само неколку месеци.

Агенцијата Арија се занимава со проекти со висока вредност, но и ризични, кои можеби ќе пропаднат, но доколку успеат, можат да го променат општеството на подобро.

– Токму овие, малку луди идеи имаат потенцијал вистински да го трансформираат сечиј живот – вели еден од осумте програмски директори на агенцијата, Јаник Вурм.

Вурм, кој претходно работел како професор по еволутивна геномика и биоинформатика на Универзитетот Квин Мери во Лондон, ќе води проект за проучување на пчелите, осите, мравките и термитите кои би можеле да дадат резултати корисни за здравјето на луѓето.

– Кога би можеле да ги откриеме и искористиме начините на кои природата ги решава предизвиците со кои се соочуваат пчелите, тоа би можело да донесе трансформација во запирање на процесот на стареење и подобрување на плодноста кај луѓето, како и нови решенија во борбата против болестите – рече тој, пишува „ Гардијан “.

Претходните истражувања утврдиле дека младите матици ја складираат спермата на бројни мажјаци во посебен орган и потоа ја ослободуваат во текот на нивниот живот за да ги оплодат нивните јајце клетки.

Во кошницата пчелите работнички ја хранат матицата со посебен секрет богат со витамини, за кој се верува дека придонесува за подолг живот на пчелите, како и специфични антиоксиданси и микроби.

Како што потсетува „Гардијан“, минатата година научниците успеале да им го продолжат животниот век на работниците со трансплантација на микроби од кралиците.

Агенцијата Арија е основана врз основа на идејата на поранешниот главен советник на поранешниот британски премиер Борис Џонсон, Доминик Камингс, а инспирирана е од американската агенција за истражувачки и одбранбени проекти Дарпа, потсетува весникот.

Aria претходно се занимаваше, меѓу другото, со безбедносни проекти во вештачката интелигенција, роботи, синтетички растенија, како и други до сега малку истражени области.

Секој проект на агенцијата Арија трае од три до пет години, но на многумина им е потребно подолго време за да дадат резултати.

– Често за нашите програми велиме дека праќаат сигнал дека нешто е можно. Не значи дека секогаш ќе успееме и на крајот на одредена програма ќе ја достигнеме посакуваната визија за иднината – изјави функционерот на агенцијата Арија, Пипи Џејмс.