Најмладите од Охрид со поддршка за лицата со ретки болести

– Здружението „Ретко е да си Редок” секоја година го обојува Охрид во боите за поддршка на лицата со ретки болести, за нивно соодветно лекување и вклопување во општеството.

Во рамки на годинешните активности за привлекување на вмниманието на јавноста на тие лица со ретки заболувања, Културолошка иницијатива „5 до 12“, во соработка со КУД „Ѓердан од Бисери” и МКОЦ „Соната” денеска на Градскиот плоштад „Св. Климент Охридски” во Охрид реализира културно-забавен настан, на кој поддршка на ретките им дадоа повеќе од 150 деца и нивните родители, како и голем број жители на Охрид.

Месецот на ретки болести во Охрид оваа година минува со особена масовност, со многу обоени дланки, пораки за поддршка и осветлени објекти. Националната кампања „Ги запознаваме ретките болсести“ оваа година го прослави и својот мал јубилеј од пет години и обработени 139 ретки дијагнози на македонски и на албански јазик.

„Поддршката стигаше цел месец од поединци и општествено одговорни компании. Охрид дефинитивно блескаше во боите на ретките болести. Во вторник на 28 февруари го заокружуваме месецот со изложба на цртежи во ’Мала станица’ во Скопје, како и со промоција на петтата по ред поштенска марка посветена на децата до ретката болест ’Ихтиоза’, изјави за МИА Гордана Лолеска, активист на Здружението „Живот со предизвици“ и претседател на Здружението „Ретко е да си редок“.