На брегот на Мароко пронајдени човечки стапалки стари 90.000 години

Пред 90.000 години луѓето шетале по песочните плажи на локацијата на градот Лараче на северозападниот брег на Мароко и оставиле траги кои „преживеале“ до денес.
Археолозите тврдат дека тоа е една од најстарите човечки траги досега забележани. Тие се добро сочувани и се верува дека се оставени од раниот хомо сапиенс и нудат редок и непроценлив увид во животот на нашите предци.

Археолозите дошле до ова откритие додека ги анализирале камењата во близина на океанот. Трагите втиснати во песокот го издржаа тестот на времето и минливоста на таквите археолошки локалитети. Реткоста го зголемува значењето на откритието.

Додека го прегледувале чакалот во близина на морскиот брег, случајно наишле на вдлабнатина во блискиот дел од песок. По деталниот преглед, стана очигледно дека станува збор за човечки стапалки. На брегот беа идентификувани вкупно 85 добро сочувани фосилизирани траги.

Користејќи модерни техники на оптички стимулирана луминисценција, истражувачите открија дека отпечатоците биле зачувани илјадници години. Оваа најсовремена техника ја откри староста на стапалките со мерење на времето откако седиментот последен пат бил изложен на сончева светлина. Преку оваа анализа на отпечатоците, тие утврдиле дека се создадени во доцниот плеистоцен, односно пред околу 90.000 години. Исто така, беше утврдено дека отпечатоците ги правеле најмалку пет лица, меѓу кои деца, адолесценти и возрасни.

Еден особено впечатлив детал е откривањето на стапалата на екстремно висок возрасен човек, кој бил висок 189 см, што е исклучителна висина за праисториските луѓе.

Понатамошното испитување на овие фосилизирани отпечатоци може да фрли светлина на различни аспекти, вклучувајќи го растот, возраста, телесната маса, брзината на одење и социјалното однесување на луѓето.

Иако фосилизирани остатоци од коски беа откриени во Африка на планинско место познато како Џебел Ирхуд, немаше докази во регионот Лараче.

Присуството на 85 стапалки е уште поизненадувачки ако се земе предвид дека повеќето археолошки локалитети од овој тип содржат помалку од неколку десетици отпечатоци. Наодите во регионот Лараче додаваат ново поглавје во разбирањето на раната човечка миграција и населување.

Научниците веруваат дека отпечатоците се зачувани илјадници години благодарение на различни фактори, кои вклучуваат локација, состав на седимент, позиција на плажата во близина на морето, плимата и осеката и други настани.