НА ИЗРАЕЛСКИОТ ПРЕМИЕР ИТНО МУ Е ВГРАДЕН ПЕЈСМЕЈКЕР: Нетанјаху префрлен во болница по големите протести

Израелскиот премиер Бенјамин Нетанјаху рано утринава итно бил префрлен во болница поради поставување пејсмејкер. Кабинетот на Нетанјаху соопшти дека премиерот ќе биде ставен под анестезија за време на операцијата и ќе биде заменет од министерот за правда Јарив Левин додека тој е подложен на процедурата.

Во кратката видео изјава, Нетанјаху рече дека „се чувствува одлично“ и планира да продолжи со својот план за судски реформи веднаш штом ќе биде пуштен од болница, пренесе АП.

Објавата на Нетанјаху, објавена по полноќ, дојде една недела откако беше хоспитализиран поради, како што беше кажано во тоа време, дехидрација.

Од болницата соопштија дека на Нетанјаху му бил вграден холтер за следење на отчукувањата на срцето, иако при прегледот не биле забележани абнормалности, пренесува РТС Танјуг.

Тоа уследи по бурниот ден на некои од најголемите протести досега против планот за судски реформи на Нетанјаху.

Стотици илјади луѓе излегоа на улиците низ Израел во саботата вечерта, додека илјадници влегоа во Ерусалим и кампуваат во близина на Кнесетот пред гласањето што се очекува во понеделник, со кое се очекува да се одобри клучниот дел од судската реформа што ги ограничува овластувањата на Врховниот суд да ги поништи владините и парламентарните одлуки што ги смета за неразумни и штетни.

Повеќе од 100 пензионирани началници за безбедност го поддржаа се поголемиот број воени резервисти, кои велат дека ќе престанат да се јавуваат на должност доколку спорниот закон биде усвоен.

Нетанјаху во јануари, неколку дена по преземањето на функцијата, најави план за реформи во судството, а оттогаш во Израел почнаа масовни протести против овој план.

Нетанјаху вели дека реформата е потребна за да се ограничат прекумерните овластувања на неизбраните судии, а критичарите велат дека тоа ќе го отвори патот за авторитарно владеење.