Николовски: Не се исплаќаат субвенциите на земјоделците, нема гарантирани откупни цени

Членот на СДСМ, Љупчо Николовски потенцира дека Владата на ВМРО-ДПМНЕ и коалицијата во првите 100 дена немаат воведено нови мерки за развој на земјоделството, нема гарантирани откупни цени и не се исплаќаат редовно субвенции.

„Идеите недостигаат, нема нови мерки, нема загарантирани откупни цени, има нередовни субвенции т.е. субвенциите не се исплаќаат и ова не потсетува на едно друго време кога се правеа партиски листи и избори“, изјави Николовски за „Сител“.

Воедно, Николовски нагласи дека кадарот на ВМРО-ДПМНЕ во Министерството за земјоделство, шумарство и води, сега има ситуација да има нула денари заостанати и повторно доцни исплатата на субвенциите, што не беше случај. во 2017 година кога СДСМ дојде на власт.

„Би бил среќен доколку во 2017 година се најдеше ситуација како оваа што ја оставивме. Затоа што нула денари е долгот на доцнење од претходните години. Не треба да се манипулира со бројките. Ако во 2017 година плаќавме субвенции од 2012 и 2013 година, сега во 2024 година имаат обврска да ги исплаќаат субвенциите кои се по тековната година, односно за 2023 година, бидејќи 2023 година се затвора во 2024 година. Иако парите се обезбедени со ребаланс, земјоделците и по два месеци од ребалансот ги чекаат парите“, рече Николовски.

Запрашан за зголемувањето на откупната цена на грозјето, Николовски нагласи дека поскапувањето е резултат на Законот за вина што беше одобрен во времето на Владата на СДСМ.