„Ништо не е исклучено!“: Британската влада му порачува на Трамп дека ќе направи се за да ги заштити националните интереси

Британскиот министер за бизнис и трговија Џонатан Рејнолдс изјави дека Соединетите Американски Држави се „најблискиот сојузник на Велика Британија“, но дека британската влада е подготвена за „сите опции“ како одговор на најновите царини воведени од американскиот претседател Доналд Трамп .

– Секогаш ќе постапуваме во најдобар интерес на британските бизниси и потрошувачи. Затоа во последните неколку недели бевме целосно фокусирани на преговори за економски договор со САД, што ќе ги зајакне нашите постоечки фер и урамнотежени трговски односи – рече Рејнолдс во изјавата по едночасовниот говор на американскиот претседател Доналд Трамп во средата за новите царини, пренесува Sky News.

Тој нагласи дека британската влада останува посветена на постигнување договор што ќе ги ублажи последиците од царините.

Сепак, тој додаде дека „ништо не е исклучено“ и дека владата ќе направи се што е потребно за да ги заштити националните интереси.

Според листата на нови американски царини објавена вчера, Трамп одлучил да воведе царина од 10 отсто за стоката што САД ја увезува од Велика Британија, што предизвика загриженост кај политичките лидери во Велика Британија, пишуваат медиумите.

Лидерот на либералдемократите Ед Дејви го нарече потегот на Трамп „деструктивна трговска војна“ и ја повика британската влада да се спротивстави на „обидите на Трамп да „раздели и владеј“.

Тој предложи Лондон да формира коалиција со земјите од Комонвелтот и Европа со цел заеднички да одговорат на американските царини, вклучително и потенцијални контрамерки.

Според проценките на британската компанија „Capital Economics“, царините од 10 отсто би можеле да го намалат британскиот БДП меѓу 0,01 и 0,06 отсто.

Исто така, САД воведоа царина од 25 проценти за увоз на автомобили од целиот свет, што може да има дополнителни економски последици за британскиот автомобилски сектор, според експертите.