Новите леќи можат да овозможат „супер ноќен вид“ без очила
Истражувачите на Универзитетот за наука и технологија во Кина развија меки контактни леќи кои им овозможуваат на луѓето да гледаат и инфрацрвени и нормално видливи бои на светлината.
Според истражувачите, со леќите може да се види инфрацрвена светлина дури и со затворени очи.
Според списанието Сел Прес (Cell Press), овие леќи работат без никаков извор на енергија и им овозможуваат на корисниците истовремено да гледаат и видливи и невидливи (за голо око) бои.
„Нашето истражување отвора потенцијал за неинвазивни носливи уреди кои ќе им овозможат на луѓето супер-вид“, рече Тиан Сјуе, невронаучник на Универзитетот за наука и технологија во Кина и водечки научник во проектот што ги разви контактните леќи.
За разлика од традиционалните очила за ноќен вид, кои се потпираат на електроника и емитуваат познат зелен сјај, овие леќи користат инженерски честички за да извршат извонредна конверзија од инфрацрвена во видлива светлина.
„Над половина од енергијата на сончевото зрачење, која постои како инфрацрвена светлина, останува незабележлива за луѓето“, рече д-р Јукијан Ма, истражувач на проектот.
Тимот се обиде да го промени тоа со вградување наночестички за конверзија – кои ја претвораат инфрацрвената светлина во видлива светлина – директно во материјалот на контактните леќи.
Луѓето можат да видат само тесен опсег на бои, со бранови должини што варираат помеѓу 400 и 700 нанометри. Секој нанометар е еднаков на еден милионити дел од милиметар.
Но други видови го доживуваат светот преку многу различни леќи. Птиците, пчелите, ирвасите и глувците можат да детектираат ултравиолетова светлина, која е под опсегот на човечкиот вид.
На другиот крај, животните како змиите и вампирските лилјаци можат да почувствуваат далечно инфрацрвено или термичко зрачење, со бранови должини далеку над опсегот видлив за луѓето, вештина што им помага да го лоцираат пленот во темница.
Тјан гледа широка примена на новоразвиените контактни леќи дури и ако немаат целосен инфрацрвен вид.
„На пример, тајните пораки испратени преку инфрацрвена светлина би биле видливи само за луѓето што носат контактни леќи“, рече тој.
Истражувачите веруваат дека подобрената перцепција зад затворените очни капаци се должи на тоа како човечкото ткиво комуницира со различни видови светлина. Очниот капак ја филтрира видливата светлина повеќе од инфрацрвената, дозволувајќи им на инфрацрвените сигнали да стигнат до мрежницата со помалку пречки.
Сепак, технологијата е сè уште во рана фаза.
Сегашните леќи не се доволно чувствителни за да го фатат инфрацрвеното зрачење со низок интензитет што природно го емитираат топлите предмети. Наместо тоа, тие ја фаќаат само светлината проектирана од ЛEД извори, кои се многу светли.
„Ако научниците за материјали можат да развијат наночестички за конверзија со поголема ефикасност, можеби ќе стане можно да се види околната инфрацрвена светлина со помош на контактни леќи“, рече Тиан.
Иако леќите сè уште не овозможуваат термички вид, што би им овозможило на корисниците да детектираат топлина што ја емитираат предметите, истражувачите велат дека апликациите се веќе ветувачки. Идната работа ќе се фокусира на правење поефикасни леќи.
„Со претворање на црвената видлива светлина во нешто како зелена видлива светлина, оваа технологија би можела да го направи невидливото видливо за далтонистите“, рече Тиан.
Леќите отвораат можност за примање тајни пораки пренесени преку инфрацрвени сигнали. Технологијата може да се прилагоди и за да им помогне на оние со оштетен вид за боја да ги конвертираат брановите должини што не можат да ги согледаат во бранови должини што можат да ги перципираат.
Новата контактна леќа, поради нејзиниот лесен пристап за носење, може да го отвори патот за развој на секојдневни уреди што можат да го прошират опсегот на тоа како го чувствуваме светот околу нас.
