Нови детали од биографијата на Фреди Меркјури: Имал тајна ќерка со која одржувал блиска врска до неговата смрт

Легендарниот фронтмен на „Квин“, Фреди Меркјури, имал тајна ќерка, родена во 1976 година од афера со сопругата на близок пријател, тврди новата биографија „Love, Freddie“ од авторката Лесли-Ен Џонс. Жената, позната само како „Б“, денес има 48 години и работи како медицински професионалец во Европа. Според книгата, Меркјури одржувал блиска и љубовна врска со неа до неговата смрт во 1991 година.

„Фреди Меркјури беше и е мојот татко. Имавме многу блиски односи од моментот кога се родив и во последните 15 години од неговиот живот. Тој ме обожаваше и ми беше посветен,“ стои во рачно напишано писмо од ќерката, објавено во книгата.

Меркјури ѝ оставил 17 тома лични дневници, кои таа ги чувала во тајност повеќе од три децении. Таа ги споделила со авторката Џонс, која вели дека првично била скептична, но автентичноста на материјалите ја убедила во вистинитоста на приказната.

Постоењето на ќерката било познато само на најблискиот круг на Меркјури, вклучувајќи ги неговите родители, сестра, членовите на бендот и долгогодишната партнерка Мери Остин. „Б“ одлучила да ја сподели својата приказна за да го прикаже Меркјури во поинакво светло и да ја раскаже вистината за нивната врска.

Книгата „Love, Freddie“ е најавена како едно од најголемите откритија во светот на шоу-бизнисот во последните децении и ќе биде објавена на 5 септември.