НОВ СЕРИОЗЕН ПРОБЛЕМ ЗА ЏО БАЈДЕН – На САД им се заканува голема криза: Ако не се постигне договор, милиони жени и деца би можеле да гладуваат !?

Претседателот на Соединетите Американски Држави (САД), Џо Бајден, и еден од неговите главни помошници во понеделникот предупредија дека „затворањето“ на федералната Влада може да предизвика широко распространето страдање, вклучително и брзо губење на субвенциите за храна за речиси седум милиони жени и деца со ниски приходи.

Џо Бајден кажа дека неуспехот на Конгресот да ја финансира федералната Влада ќе има страшни последици за црнечката заедница, вклучително и намалување на субвенциите за храна, инспекции на локациите за опасен отпад и спроведување на законите за праведно домување.

Тој кажа дека тој и претседателот на Претставничкиот дом, Кевин Мекарти, републиканец, се договориле пред неколку месеци за нивоата на трошоци за Владата.

„Склучивме договор, се ракувавме. Сега мала група екстремни републиканци во Претставничкиот дом не сакаат да го почитуваат тој договор и секој во САД може да се соочи со плаќање на цената за тоа“, вели Џо Бајден.

На прашањето дали разговарал со Кевин Мекарти, Џо Бајден одговори дека не разговарал. На прашањето кога ќе разговараат, тој одмавна со главата.

Американскиот секретар за земјоделство, Том Вилсак, претходно им кажа на новинарите дека „огромното мнозинство“ од седумте милиони учесници во Специјалната програма за дополнителна исхрана за жени, доенчиња и деца (WIC) ќе забележат итно намалување на придобивките во деновите и неделите по „исклучувањето“.

Скоро половина од новороденчињата во САД се потпираат на WIC.

Специјалната програма за помош во исхраната (SNAP) ќе продолжи како и обично до октомври, но и таа може да биде засегната од исклучувањето после тоа.

Повеќе од 40 милиони Американци се потпираа на SNAP за да врзат крај со крај во 2022 година. Инфлацијата изврши нов притисок врз буџетите на домаќинствата, со цени повисоки од пандемијата на Ковид-19 за различни стоки – од леб до свеж зеленчук и детска формула.

За време на исклучувањето, агенциите за земјоделски услуги, исто така, ќе престанат да им даваат заеми на земјоделците за време на жетвата, а оние што сакаат да купат домови нема да можат да добијат заеми во руралните области.

Над 50.000 работници на Министерството за земјоделство на САД ќе бидат на неплатен одмор.

Претставничкиот дом, кој е под контрола на републиканците, би можел оваа недела да се придвижи кон драстично намалување на трошоците што речиси сигурно ќе биде отфрлено од Сенатот под контрола на демократите.

Иако намалувањата нема да станат закон, неуспехот на двата дома да се договорат може да доведе до делумно затворање на американската Влада до следната недела.

Пратениците во Претставничкиот дом требаше да разгледаат во вторник четири нацрт-закони за трошење за претстојната фискална година, кои исто така ќе воведат нови ограничувања за пристапот до абортуси, ќе ја повлечат климатската иницијатива на администрацијата на Џо Бајден вредна 11 милијарди долари и ќе ја продолжат изградбата на граничниот ѕид со Мексико на поранешниот претседател, Доналд Трамп.

Џо Бајден вети дека ќе стави вето на најмалку два нацрт-закони.