ОВА МУ СЕ НЕМА СЛУЧЕНО НА МАНЧЕСТЕР ЈУНАЈТЕД 37 ГОДИНИ – Дебакл на “Олд Трафорд“, Манчестер Сити ги посрамоти: “Ова не беше натпревар, не знаеја што прават!“
Сер Алекс Фергусон се пензионираше пред десет години, а оттогаш Манчестер Јунајтед загуби исто толку натпревари на „Олд Трафорд“ како и за време на неговото 26-годишно владеење. Самата таа реченица покажува колку „Црвените ѓаволи“ се во криза по заминувањето на легендарниот тренер, а претходниот ден доживеаја нов удар со големиот пораз од градскиот ривал од Манчестер Сити (0:3). Ова е петти првенствен пораз во десет натпревари, а тоа не му се случи на Манчестер Јунајтед од 1986/87 сезона.
„Ова беше натпревар меѓу екипи кои се на спротивни нивоа. Фудбалерите на Манчестер Јунајтед едноставно се послаби и побавни во сите аспекти на играта, технички и тактички. Има многу работа пред нив за да се вратат на старата слава“, коментираше легендата на Манчестер Јунајтед, Рој Кин, кој сега работи за Sky Sports.
Неговиот колега Мајкл Ричардс, поранешен фудбалер на Манчестер Сити и англиската репрезентација, имаше слични размислувања:
„Ова беше фудбалска лекција, неверојатна. Џон Стоунс заврши одлична работа. Играчите на Манчестер Јунајтед не знаеја што да прават“.
Во низата поранешни репрезентативци и сегашни коментатори се приклучи и Крис Водл.
„За мене ова воопшто не беше натпревар. Подобриот тим беше убедливо подобар. Манчестер Јунајтед имаше неколку шанси, но Манчестер Сити ја контролираше играта 88 минути. Разликата меѓу овие два тима е неверојатна. Манчестер Јунајтед мора да почне од нула и да донесе нови играчи. Ова само ја покажува разликата во квалитетот во корист на Манчестер Сити“.
„Манчестер Јунајтед е навистина слаб во моментов. Манчестер Сити не мораше ниту да игра на своето највисоко ниво денеска“, додаде Гери Невил.
Тренерот на Манчестер Јунајтед, Ерик тен Хег не беше премногу самокритичен.
„Во првото полувреме игравме добро, добро се браневме. Имавме неколку прилики, но не ги искористивме, а пеналот го смени текот на играта. Во вториот дел моравме да нападнеме, а знаевме дека ќе одговорат со висок притисок. Откако го примивме вториот гол, играта беше завршена. Прерано го добивме, а потоа направивме многу грешки. Мора да бидеме подобро организирани, разочарани сме и лути, но сепак одигравме добро во првото полувреме“, изјави Холанѓанецот.
Пеп Гвардиола, тренерот на Манчестер Сити задоволно зрачеше по победата.
„Секогаш се чувствуваме добро на овој стадион. Играчите одиграа најдобро. Многу сум среќен за нашите навивачи, знам колку им значи ова. Додека Сер Алекс Фергусон беше во Јунајтед, Сити со години беше во подредена позиција, но ние ги променивме работите во последните неколку години“, изјави шпанскиот тренер и додаде: „Во првите 5-10 минути загубивме неколку топки против екипа која е многу опасна во вакви ситуации, но подоцна ја презедовме контролата и одигравме фантастично во вториот дел“.
