Ова нема да му се допадне на Киев! Орбан: Унгарците ќе гласаат дали сакаат Украина да влезе во Европската унија
Унгарците ќе гласаат дали сакаат Украина да влезе во Европската унија, изјави унгарскиот премиер Виктор Орбан, иако гласањето не е обврзувачко и речиси сигурно ќе биде против Киев.
Говорејќи пред новинарите по вонредниот самит на сите 27 лидери на ЕУ во Брисел, на кој Унгарија беше единствената против заедничка поддршка за вооружување на Украина преку формирање специјален финансиски инструмент од 150 милијарди евра заеми за инвестиции во одбраната, Орбан рече дека неговата влада ќе ги испита Унгарците за нивната поддршка за пристапот на Украина во ЕУ, пишува Политико.
– Имаме таканаречена национална консултативна шема, која редовно ја користиме за собирање на мислењата на луѓето, така што истата шема ќе ја користиме и сега – рече тој.
Од 2010 година, владата на Орбан започна повеќе од десетина таканаречени национални консултации за различни прашања, од миграција до правата на ЛГБТК+. Ова се кампањи по пошта во кои сите Унгарци со право на глас добиваат писма со прашања и покана да изберат опции од списокот со одговори, понекогаш едноставно да или не.
Првпат во Европа
Прашањата често се формулирани сугестивно, а огромното мнозинство одговори се обидуваат да се усогласат со позицијата на владата, тврдат унгарските медиуми, додека опозицијата и граѓанското општество ги критикуваат како пропагандна алатка.
На пример, за време на миграциската политика на ЕУ во 2023 година, Унгарците беа прашани дали го поддржуваат предлогот на Брисел за „создавање мигрантско гето“ во Унгарија. Помалку од 20 отсто од Унгарците учествуваа во истражувањето на јавното мислење, но 99 отсто од оние кои го направија рекоа „не“.
Резултатите не се правно обврзувачки, но се користат за зајакнување на позициите на владата на Орбан за прашањата кои предизвикуваат поделби, кои според него се поддржани од мнозинството електорат.
– За првпат во Европа, Унгарците имаат можност да одлучат дали ќе го поддржат членството на Украина во ЕУ – изјави портпаролот на унгарската влада Балаш Орбан, пренесува „Политико“.
