“ОВА НЕ Е ПОЛСКА ВЛАДА!“ – Илјадници Полјаци во Варшава демонстрираа против Доналд Туск и неговото враќање на власт

Неколку илјади поддржувачи на конзервативната опозиција демонстрираат во Полска против левичарската Влада на новиот премиер Доналд Туск.

Претежно постарите приврзаници на националистичката конзервативна партија Право и правда (ПиС) попладнево се собраа пред зградата на парламентот во Варшава. Тие вееја полски знамиња и плакати на кои пишуваше: „Ова е Полска, а не земјата на Доналд Туск“.

Лидерот на партијата ПиС, Јарослав Качињски, им кажа на демонстрантите:

„Ова не е полска Влада“.

ПиС често го обвинува Доналд Туск, поранешен претседател на Европскиот совет, дека дејствува во име на Германија.

„Протестот на слободните Полјаци“ организиран од популистите кои ја загубија власта на изборите во октомври првично имаше за цел да изрази гнев против реструктуирањето на јавниот медиумски систем.

Владата на Доналд Туск почна со реорганизација на телевизискиот канал ТВП, полското радио и медиумската агенција ПАП – сите кои ПиС постојано ги ставаше под своја контрола во текот на осумте години на власт.

Сепак, апсењето на двајца поранешни функционери на ПиС, кои беа осудени на две години затвор поради обвиненија за корупција, го помести фокусот на демонстрациите. Апсењето на поранешниот министер за внатрешни работи Мариуш Камински и неговиот заменик Мациеј Вашик ја доведе Полска на работ на уставна криза.

Двајцата политичари беа уапсени во вторникот и одведени во затвор, откако првично побараа засолниште во претседателската палата кај претседателот Анджеј Дуда, кој е сојузник на ПиС.

ПиС ги опишува двајцата како „политички затвореници“, а Мариуш Камински почна штрајк со глад.

Анджеј Дуда непосредно пред почетокот на демонстрациите најави дека ќе се обиде да ги помилува двајцата по вторпат.