ОВА СЕ ЧЕТИРИТЕ КАНДИДАТИ ЗА ГЕРМАНСКИ КАНЦЕЛАР: Во недела се одржуваат предвремени парламентарни избори во најголемата земја во ЕУ

Во Германија во недела се одржуваат парламентарни избори на кои четворица фаворити за канцеларската функција.

Олаф Шолц

Актуелниот канцелар, Олаф Шолц, социјалдемократ од левиот центар, има долгогодишно искуство во владата, откако претходно беше градоначалник на Хамбург и министер за труд и финансии. Шолц иницираше напори за модернизација на германската војска по руската инвазија на Украина и ја направи втор по големина снабдувач на Украина.

Неговата влада спречи енергетска криза и се обиде да се спротивстави на високата инфлација. Сепак, неговата трипартиска коалиција стана озлогласена по внатрешните борби и се распадна во ноември минатата година додека се расправаше за тоа како да се ревитализира германската економија, која се намали во последните две години.

Фридрих Мерц

Фридрих Мерц, лидерот на опозицијата, беше фаворит во изборната кампања, а неговиот централно-десничарски блок води во анкетите. Тој стана лидер на партијата Христијанско-демократска унија (ЦДУ) откако долгогодишната канцеларка Ангела Меркел поднесе оставка во 2021 година.

Мерц ја водеше својата партија во поконзервативна насока, а во предизборната кампања го стави на преден план сузбивањето на нерегуларната миграција. Тој беше пратеник во Европскиот парламент во 1989 година, а пет години подоцна стана пратеник во германскиот парламент. По 2009 година паузираше неколку години од активната политика. Мерц, исто така, работеше како адвокат неколку години и беше на чело на надзорниот одбор на германската филијала на фирмата Блек Рок.

Роберт Хабек

Роберт Хабек е кандидат на Зелените, а моментално е вицеканцелар и министер за економија и клима, одговорен за енергетски прашања.

Како ко-лидер на Зелените од 2018 до 2022 година, тој беше одговорен за порастот на популарноста на партијата, но се повлече во 2021 година за да и дозволи на Аналена Баербок, сега министер за надворешни работи на Германија, да се кандидира за канцелар. Досието на Хабек како министер наиде на различни критики, особено во врска со планот што неговото министерство го подготви да ги замени системите за греење со фосилни горива со позелени алтернативи што ги продлабочи поделбите во владата.

Алис Вајдел

Алис Вајдел е кандидат на екстремно десничарската антиимигрантска Алтернатива за Германија (AfD). Економист по обука, Вајдел се приклучи на партијата набргу откако беше основана во 2013 година.

Таа е копретседател на парламентарната група откако АфД за првпат освои места во парламентот во 2017 година. Таа е копретседател на самата партија од 2022 година, заедно со Тина Чрупал. Во декември таа беше номинирана за кандидат за канцелар, иако другите партии велат дека нема да соработуваат со АфД.