Операција „Вортекс“: ДДВ измама тешка 100 милиони евра за продажба на луксузни автомобили низ Европа
Европското јавно обвинителство (ЕППО) во Франкфурт и Милано започна операција со кодно име „Вортекс“ против мрежи кои вршат измами со ДДВ поврзани со продажба на илјадници половни луксузни автомобили со проценета штета од 100 милиони евра.
Како дел од истрагата предводена од ЕППО, во средата биле спроведени околу 80 претреси во Бугарија, Хрватска, Германија, Италија, Латвија, Луксембург и Полска, со поддршка на 500 агенти за спроведување на законот (даночни и полициски службеници), додека шест лица беа уапсени во Германија и Италија, соопшти обвинителството.
„Дополнително, запленети се средства во вредност од над 20 милиони евра, при што 50 банкарски сметки се замрзнати само во Италија и запленети се 14 имоти, како и две парцели земјиште и 25 автомобили, вклучувајќи 19 луксузни возила. Два автомобила, готовина и луксузни предмети се запленети и во Германија, а замрзнати се и банкарски сметки“, додаде ЕППО.
Криминалните групи под истрага се осомничени за учество во голем синџир за измами со ДДВ. Ова е сложена шема што ги искористува правилата на ЕУ за прекугранични трансакции меѓу земјите-членки, кои се ослободени од данок на додадена вредност (ДДВ).
Според истрагите, неколку илјади автомобили биле продадени во прекугранични измами низ цела Европа, користејќи стотици фиктивни компании, фалсификувани документи и фиктивни фактури за да се избегне плаќање на ДДВ.
Во некои случаи, возилата биле фиктивно продадени на компании во Лихтенштајн и Сан Марино, каде што автомобилите никогаш не биле регистрирани, пред всушност да бидат продадени на продавачи на автомобили и клиенти во Италија и други земји-членки.
Дополнително, измамите ѝ овозможиле на криминалната мрежа да бара поврат на ДДВ од националните даночни органи, на што осомничените сторители немале право, што довело до значителен нелегален профит.
Криминалните групи, исто така, лажно примениле намален ДДВ, според таканаречената „шема за оданочување на маржа“. Оваа одредба им овозможува на препродавачите да плаќаат ДДВ само на нивната маржа на профит при продажба на половна стока купена од приватни лица. Сепак, компаниите што се под истрага нелегално ја применувале оваа одредба.
Се проценува дека активностите што се под истрага предизвикале загуби од најмалку 100 милиони евра за буџетите на ЕУ и националните буџети.
Обвинителството соопшти дека истрагите се потпирале на поддршката од Европол преку аналитичка помош и алатки за координација, со дополнителна поддршка од националните агенции за спроведување на законот.
ЕППО е независно јавно обвинителство на Европската Унија. Тоа е одговорно за истражување, гонење и донесување пред суд кривични дела против финансиските интереси на ЕУ.
