ОСМАНИ: Разговорите меѓу Белград и Приштина не можат да продолжат, Србија сака Крим на Косово (фото)

Претседателката на Косово, Вјоса Османи, ги обвини Србија и нејзиниот претседател Александар Вучиќ дека се одговорни за нападот на вооружен одред врз косовската полиција минатиот викенд, велејќи во интервју за Ројтерс дека Косово бил „под напад“.

Во борбите загинаа тројца српски напаѓачи и еден косовски полицаец.

– Косово беше нападнато – изјави Османи во интервју за Ројтерс. „(вооружената) група едноставно ги спроведуваше намерите и мотивите на Србија како земја и Вучиќ како лидер – додаде таа.

Османи рече дека Србија се уште има територијални претензии кон Косово и дека сака да го постигне „кримскиот модел“ со создавање тензии на северот на Косово каде живеат околу 50 илјади Срби.

– Она што би му кажала на претседателот Вучиќ е да престане да се плетка со Косово. Косово по секоја цена ќе ја брани својата слобода, својата независност и својот суверенитет – нагласи Вјоса.

– Тие се обидуваат да го спроведат кримскиот модел во Република Косово, но ние апсолутно нема да дозволиме тоа да се случи, ќе ја браниме секоја педа од територијата на Косово – додаде таа.

Османи рече дека слични напади може да се повторат во блиска иднина и апелираше до меѓународната заедница да направи сè за да ја спречи Србија да ги поддржува ваквите вооружени групи.

– Многу сум загрижена дека такви напади, дури и од поголеми размери, може да се случат во иднина, доколку Србија не биде осудена, пред сè за овој терористички акт на агресија – рече таа.

Tаа посочи дека разговорите меѓу Белград и Приштина не можат да продолжат.

-Тоа веќе не е можно. Ние бевме жртви на српската агресија и отсега сите така треба да се однесуваат кон неа – рече Османи.