Откриено името на донаторот: Пари за американската војска дадени од мистериозен милијардер кој инвестираше милиони во победата на Трамп
Тимоти Мелон, пензиониран милијардер и главен финансиски донатор на американскиот претседател Доналд Трамп, е анонимен приватен донатор кој донирал 130 милиони долари за да помогне во плаќањето на војниците за време на блокадата на владата, пишува „Њујорк тајмс“.
Трамп ја објави донацијата во четврток вечерта, но одби да го именува лицето кое ги обезбедило средствата, опишувајќи го само како патриот и пријател.
Сепак, две лица, кои разговараа со „Њујорк тајмс“ под услов на анонимност бидејќи донацијата е приватна, го идентификуваа донаторот како Мелон.
Кратко по заминувањето од Вашингтон во петокот, Трамп повторно одби да го открие идентитетот на Мелон додека разговараше со новинарите во авионот „Ер Форс Уан“. Тој само рече дека лицето е „одличен американски граѓанин и голем човек“.
„Тој не сака публицитет. Тој би претпочитал да не се споменува неговото име, што е доста невообичаено во светот од каде што доаѓам и во светот на политиката, каде што секој сака да му се спомене името“, рече Трамп.
Мелон, богат наследник на банкарско семејство и железнички магнат, е долгогодишен поддржувач на Трамп и донирал десетици милиони долари на групи што ја поддржуваат неговата кампања.
Минатата година, тој донирал 50 милиони долари на група што го поддржува Трамп, што е една од најголемите индивидуални донации досега.
Внук на поранешниот министер за финансии Ендру В. Мелон, Мелон не беше истакнат донатор на Републиканската партија сè до изборот на Доналд Трамп. Но, во последните неколку години, тој инвестираше стотици милиони долари во поддршка на Трамп и Републиканската партија.
Мелон, кој живее претежно во Вајоминг, се држи вон фокус и покрај огромните политички трошоци.
Тој е исто така значаен поддржувач на министерот за здравство Роберт Ф. Кенеди Џуниор, кој исто така се кандидираше за претседател минатата година. Мелон донираше милиони долари за претседателската кампања на Кенеди, а исто така даде пари и на неговата антиваксерска организација, „Дифенс хелт дејнс“.
Пентагон објави дека ја прифатил донацијата врз основа на општото овластување за прифаќање подароци.
„Донацијата е дадена под услов да се искористи за покривање на трошоците за плати и бенефиции за припадниците на вооружените сили“, изјави Шон Парнел, главен портпарол на Пентагон.
Сепак, донацијата се чини дека е потенцијално кршење на Законот за борба против дефицитот, кој ѝ забранува на федералната администрација да троши пари над износот одобрен од Конгресот или да прифаќа волонтерски услуги.
Останува нејасно колку таа донација всушност би можела да ги покрие трошоците за плати за повеќе од 1,3 милиони активни војници. Според Канцеларијата за буџет на Конгресот, администрацијата на Трамп побарала околу 600 милијарди долари вкупна воена компензација во буџетот за 2025 година. Донација од 130 милиони долари би изнесувала приближно 100 долари по војник.
