Памела Андерсон за стандардите за убавина: Преку изглед без шминка, сакав да се сетам која сум
Памела Андерсон зборуваше за стандардите за убавина, вештачката интелигенција и филтрите во неодамнешно интервју.
Во врска со нејзината улога во претстојниот филм „Голиот пиштол“, актерката разговараше за „Харперс Базар“ и истакна дека верува оти луѓето стануваат здодевни поради употребата на вештачка интелигенција и филтри на фотографиите.
„Мислам дека со вештачката интелигенција и филтрите, луѓето стануваат малку здодевни. Сакам да ги предизвикам нормите за убавина, отсекогаш сум била бунтовник. Никогаш не гледам некого и не мислам дека сакам да изгледам така. Само сакам да знам која сум. Во еден момент мора да кажеш: Ова е сè што имам, пушти го. Тоа е вистинска среќа“, рече таа.
Потоа се осврна на нејзините неодамнешни појавувања на јавни настани без шминка.
„Слобода е да знаеш дека можеш да одиш по црвениот тепих без ни трошка шминка. Зошто не можам? Мажите го прават тоа постојано“, тврди таа.
Андерсон е пофалена за поставување нови стандарди за убавина во култура во која сè повеќе доминираат филтрите и совршенството.
„Чувствувам како да ми е дадена оваа втора шанса, која не ја добива секој, и можам да го направам тоа на свој начин“, рече таа.
Кон крајот на минатата година, во интервју за „Ентертејнмент тунајт“, актерката објасни како дошла до одлуката повеќе да не носи шминка.
„Овој поглед со голо лице е едноставно начинот на кој почнав. Само сакав да се сетам која сум. Цел живот играм ликови, сакам да го правам тоа во филмови, а не во мојот личен живот. Само сакам да бидам своја. Ова е експеримент за мене, нешто што сакам да го правам, а не ни знаев дека некој ќе забележи“, тврди таа.
Андерсон се појавува во рестартираниот филм „Гол пиштол“ заедно со ирскиот актер Лиам Нисон. Филмот треба да излезе ова лето.
„Ќе покаже една поинаква страна од мене. Чувствувам дека секој филм што го снимам во последно време лекува различни делови од мене. Потребен ви е голем, неуреден живот од кој ќе црпите инспирација ако сакате да ги направите ваквите работи интересни. Обожавам да бидам во креативен простор, тоа е моето среќно место. Ја сакам поезијата, филмот и музиката и чувствувам дека само се обидувам да го живеам овој дел од мојот живот што е можно поавтентично“, рече таа.
