Планирани се 12,7 милиони евра за реконструкција на Воената болница во Скопје и на охридскиот аеродром

Обезбедуваме 12,7 милиони евра за реконструкција на Воената болница во Скопје и модернизација на охридскиот аеродром. Преку предлог Законот за даночно ослободување, со цел склучување анекс на договорот за концесија со компанијата ТАВ Македонија, кој од минатата недела беше поднесен од пратениците, ќе се инвестира во клучна транспортна и здравствена инфраструктура, изјави денеска Драгана Бојковска, пратеничка од пратеничката група на ВМРО-ДПМНЕ и коалицијата Твоја Македонија.

„Во главната градска болница во Скопје, повеќе нема да се оперира под покиснати тавани, пациентите и медицинскиот персонал нема да се возат во темни и застарени лифтови. Операционите сали пак ќе се срушат до нула, а на нивно место ќе се изградат нови, во кои ќе има најсовремена хируршка опрема. Ќе се реконструира и одделението за интензивна нега, како и лабораториите. Скопската воена болница ќе добие целосно нов лик и биде додадена вредност во македонското здравство.

Охридскиот аеродром пак, ќе биде реконструиран за првпат по неговата изградба. Се предвидува нова административна зграда, нов простор за обезбедување, целосна реконструкција и адаптација на постојната терминална зграда. Проект кој ќе придонесе кон подобри услови како за патниците, така и за вработените на аеродромот.

Сево ова ќе биде финансирано од компанијата ТАВ Македонија, кои исто така ќе бираат и проектанти и изведувачи, како дел од обврските кои ги имаат спрема државата. ВМРО-ДПМНЕ создава трајни вредности, за Македонија да стане подобро место за секого. Па затоа, ги повикувам пратениците од сите политички партии да дадат поддршка за законот кој ќе ги овозможи овие клучни капитални инвестиции“, рече Бојковска.