Погледнете како Кина ги исмева царините на Трамп: Илустрација која многу зборува (фото)
Пекинг продолжува да дава иронични коментари за трговската политика на поранешниот американски претседател Доналд Трамп, чии нови царини за кинески стоки предизвикуваат силни реакции, но и потсмев.
Портпаролката на кинеското Министерство за надворешни работи Мао Нинг на социјалните мрежи објави илустрација на црвена капа со слоганот на кампањата на Трамп „Make America Great Again“, но со додаток кој не можеше да остане незабележан – под натписот стои ознаката „Made in China“.
Дополнително, прикажана е и цената од 50 долари, која е пречкртана, а новата цена е 77 долари – очигледна алузија на поскапувањето на американските увезени стоки предизвикано од реципрочно наметнатите царини.
Оваа порака доаѓа во време кога се најавени нови трговски мерки. Трамп најави зголемување на царините за кинески производи на вкупно 125 отсто, како одговор на кинеските царини за американски производи од 84 отсто. Иако ваквите драстични бројки укажуваат на разнишана трговска клима, кинеските берзи бележат раст, што дополнително го зајакнува контрастот меѓу американската реторика и фактичката ситуација на теренот.
Кина вели дека не се плаши од трговска војна. Портпаролот на Министерството за надворешни работи, Лин Џијан, истакна дека новите царини на Кина се „неопходни контрамерки против злоупотребата на САД“ и имаат за цел да го заштитат суверенитетот на Кина, меѓународната правда и интересите на светската заедница.
„Овој потег не е само против Кина. Тоа е напад врз целиот свет“, рече Џијан. Тој ги обвини САД дека ја користат трговијата како средство за притисок и доминација, наместо како простор за еднаков дијалог и соработка.
Иако реципрочните царини се одложени за 90 дена, основната тарифа од 10 проценти стапува веднаш на сила за повеќето стоки увезени во САД. Сепак, постојните секторски давачки за автомобили, челик и алуминиум остануваат на сила, додека во наредните месеци ќе се преговара за нови услови за трговија.
„Ако САД сакаат да разговараат, мора да покажат став на еднаквост, почит и взаемна корист. Кина не започна трговска војна, но ако биде принудена, ќе се бори до крај“, рече Лин Џијан.
Пекинг на тој начин јасно става до знаење дека, покрај економската одмазда, ќе продолжи и симболично да се спротивставува на политиките на Трамп – дури и преку хумористични илустрации кои, со неколку зборови и бројки, кажуваат повеќе од илјада анализи.
