Полскиот Сејм ги усвои новите изборни правила пред гласањето во октомври или ноември годинава

– Долниот дом на полскиот Парламент го усвои амандманот на изборниот законик со цел да се зголеми излезноста на гласачите на годинашните парламентарни избори, што според опозицијата е незаконско и ќе биде од корист за владејачката партија, пренесоа британските медиуми.

Според измените, ќе може да се отворат повеќе избирачки места во селата со само 200 жители, а до местата ќе треба да се организира автобуски превоз за лицата над 60 години или за лицата со попреченост доколку нема редовен јавен превоз.

Критичарите на усвоените измени велат дека изборниот законик не треба да се менува во годината во која ќе се спроведат изборите. Тие се повикуваат на пресудата на Уставниот суд во која се вели дека не треба да се прават суштински измени на законикот шест месеци пред да се закажат избори.

Измените, исто така, мора да бидат изгласани и во Горниот дом на парламентот, а потоа одредбите мора да бидат потпишани и од претседателот на државата за да станат закон, така што најверојатно нема да стапи на сила во оваа временска рамка.

Полска ќе има парламентарни избори во октомври или ноември, а додека владејачката партија Право и правда (ПиС), која има силна поддршка меѓу постарите и руралните гласачи, сè уште води во анкетите, поддршката за неа почна да опаѓа поради трошоците за животна криза.

Доналд Туск, лидерот на главната опозициска партија, Граѓанска платформа, рече дека промената на правилата во изборна година „ги крши основните принципи на демократијата“.

-Доколку ПиС се подготвени да манипулираат со изборниот закон за да ги зголемат своите изборни шанси, лесно е да се замисли дека тие ќе бидат способни и за други видови манипулации, рече Туск.

Заменик-претседателот на ПиС, Ришард Терлецки, пак, кажа дека единствената цел на промените е да се зголеми излезноста на гласачите.

Аналитичарите велат дека е тешко да се процени влијанието на новите правила врз изборните резултати во оваа фаза, но таквите промени воведени толку блиску до изборите се незаконски и тешко ќе се спроведат.

-Нашите истражувања покажуваат дека тоа нема да го зголеми одѕивот на гласачите, ефектот ќе биде минимален. Ако ова беше искрена идеја, ќе го зголемат бројот на избирачки места најмногу на места со голема густина на население, во градовите, коментира Ана Матерска – Сосноовска, политиколог на Универзитетот во Варшава.