Појадок кој го намалува ризикот од срцев удар
Физичката неактивност, лошите навики како што се мрсната храна, алкохолот и цигарите, многу му штетат на срцето. Затоа, се чини дека не е секогаш лесно да се грижиш за него. Сепак, како и во повеќето случаи кога станува збор за здравјето, некои мали навики можат значително да ја подобрат ситуацијата и да го намалат ризикот од срцев удар.
„Едно јајце му дава сила на телото“, е позната поговорка, но се испостави дека е подобро да се изеде грст јаткасти плодови за појадок. Замената на јајцето со 25 до 28 грама јаткасти плодови може да го намали ризикот од кардиоваскуларни болести за 17 проценти, вклучувајќи го и ризикот од срцев удар , заклучија истражувачите.
Научниот преглед, објавен во списанието BMC Medicine, покажа дека нема корист од замена на рибите и морските плодови со опции од растително потекло и дека нема докази дека замената на млечните производи може да го намали ризикот од кардиоваскуларни болести. Замената на јајцата со јаткасти плодови или цели зрна, сепак, резултираше со помал ризик од развој на дијабетес тип 2.
Луѓето кои замениле 50 грама преработено месо со иста количина мешунки, како што е леќата, имале 23 отсто помал ризик од развој или смрт од кардиоваскуларни болести. Ризикот им бил за 27 отсто помал доколку јаделе од 28 до 50 грама јаткасти плодови наместо преработено месо.
Дополнително, заменувањето на преработеното месо, јајцата, сирењето, путерот или јогуртот со авокадо е поврзано со помал ризик од кардиоваскуларни болести. Сепак, авторите предупредуваат дека податоците се базираат на резултатите од само една студија.
„Многу луѓе го започнуваат денот со јајце или преработено месо за појадок, но резултатите од оваа анализа покажуваат дека можеби е подобро оваа храна да се замени со растителна храна. Исто така, постојат докази дека луѓето би можеле да имаат корист од замена на живината со растителна храна“, вели д-р Сабрина Шлезингер од германскиот центар за истражување на дијабетес.
Резултатите покажуваат дека замената на путерот со маслиново масло може да го намали ризикот од кардиоваскуларни болести за четири проценти. Најголемо намалување на ризикот од кардиоваскуларни болести, од 36 отсто, може да се забележи кај луѓето кои замениле 50 грама преработено месо дневно со 30 грама цели зрна, покажува анализата. Замената на црвеното или преработеното месо со јаткасти плодови, интегрални житарки или житарки го намали ризикот од дијабетес тип 2. Најголемо намалување на шансите за рана смрт, од 21 отсто, е забележано кога преработеното месо било заменето со јаткасти плодови, пренесува index.hr .
