ПРЕДИЗВИКА ГОЛЕМО ВНИМАНИЕ- Огромниот објект од австралиската плажа не е мистерија, вели шефот на индиската агенција

Шефот на индиската вселенска агенција изјави дека огромната метална купола што се појавила на австралиска плажа е дефинитивно дел од ракета, но можеби не е индиска. „Не можеме да потврдиме дека е наше додека не го анализираме“, изјави С Соманат за Би-Би-Си.

Објектот е предмет на многу шпекулации откако беше откриен на плажата Грин Хед, околу 250 километри северно од Перт, во текот на викендот. Некои дури рекоа дека тоа би можело да биде дел од ракетата од најновото лансирање на индиската мисија на Месечината минатиот петок, но експертите побрзаа да го побијат тоа.

Веројатно тоа е резервоарот за гориво на ракетата

Цилиндричниот објект широк околу 2,5 метри и долг меѓу 2,5 и 3 метри предизвика голема возбуда кај мештаните.

Првично се шпекулираше дека остатоците би можеле да бидат дел од MH370 – авионот што исчезна кај западниот брег на Австралија во 2014 година со 239 патници. Сепак, воздухопловните експерти набрзо појаснија дека објектот не можел да потекнува од комерцијален патнички авион и дека најверојатно станува збор за резервоар за ракетно гориво кој во одреден момент паднал во Индискиот Океан.

Австралиската вселенска агенција тогаш соопшти дека е можно огромниот цилиндар да паднал од „странска вселенска носарка“. Ова доведе до шпекулации дека објектот е резервоар за гориво на PSLV – поларните сателитски лансери што Индиската организација за вселенско истражување (ISRO) редовно ги користи за лансирање сателити во вселената.

Тој беше во вода со месеци

Откако еден последен пат беше искористен минатиот петок за испраќање на вселенското летало Chandrayaan-3 во орбитата, имаше шпекулации дека остатоците дошле од тоа – и покрај тоа што експертите велат дека објектот бил во вода најмалку неколку месеци. Фотографиите на кои е покриен со школки го поддржуваат тоа тврдење.

Соманат, кој ја предводи ИСРО, изјави за Би-Би-Си дека „нема мистерија“ за објектот, потврдувајќи дека „е дел од ракета“. „Тоа може да биде PSLV или било кој друг и додека не го видиме и анализираме, не може да се потврди“, рече тој. Австралиските власти допрва треба да соопштат дополнителни детали.

Меѓутоа, Соманат потврди дека „познато е дека некои делови од ПСЛВ паднале во морето надвор од ексклузивната економска зона на Австралија“ и рече дека објектот „можел да лебди долго време и конечно да стигне до брегот“. Тој додаде дека нема опасност поврзана со урнатините.

Австралиските власти, сепак, рекоа дека го третираат објектот како „опасен“ и полицијата ги замоли луѓето да се држат настрана. Некои експерти рекоа дека може да содржи токсични материи.