Премиерот на Индија на гости кај Путин додека Западот и Украина критикуваат
Индискиот премиер Нарендра Моди се сретна со рускиот претседател Владимир Путин во Москва, што е негова прва официјална посета од почетокот на неговиот трет мандат на функцијата.
Западот будно ја следи посетата на Моди на Путин.
Моди пристигна во Русија во понеделникот, само неколку часа по руските напади низ Украина во кои загина повеќе од 41 лице и беше погодена детската болница во Киев.
Видеото од насмеаниот Путин кој го нарекува Моди „мојот најдраг пријател“ и му вели дека е „задоволен што го гледа“ стана вирално во Индија.
Дводневната посета на Моди, негова прва на Русија од 2019 година, се совпаѓа со самитот на НАТО во Вашингтон, каде војната во Украина ќе биде главна тема.
Индија, клучна светска економија, има блиски врски и со Русија и со САД.
Соработниците на Моди велат дека тајмингот на неговата посета на Москва не треба да биде голем проблем, бидејќи тоа е долгорочно стратешко партнерство меѓу двете земји и дека овој датум на средбата нема никаква врска со самитот на НАТО.
Сепак, Американците не гледаат позитивно на посетата на Моди на Путин и бараат од него да го нагласи територијалниот интегритет на Украина за време на разговорите во Москва.
Украинскиот претседател Володимир Зеленски беше поостар.
„Огромно разочарување и поразителен удар за мировните напори е да се види како лидерот на најголемата светска демократија го прегрнува најкрвавиот криминалец во светот“, напиша Зеленски на социјалната мрежа Х.
Самитот на НАТО во Вашингтон, кој започнува денеска, се одржува по повод 75-годишнината од западната одбранбена група која беше формирана главно како бедем против тогашниот Советски Сојуз по Втората светска војна.
Земјите од НАТО силно се спротивставија на инвазијата на Москва на Украина, додека Индија и Моди се воздржаа од каква било експлицитна критика на Путин.
Индија и Моди повикаа на дијалог и дипломатско решение од почетокот на конфликтот.
Додека западните земји се обидуваат да ја изолираат Москва со воведување санкции, Путин постојано одржува состаноци со лидерите на другите светски сили, како Кина, Индија и Турција.
Индија и Русија споделуваат блиски одбранбени и стратешки односи кои датираат од времето на Студената војна, а Москва останува клучен снабдувач на оружје.
Индија, која ја има една од најголемите армии во светот, има долготрајни гранични спорови со соседите – Пакистан и Кина.
