Прилепското обвинителство бара притвор за осомничениот кој пукал во Центарот за социјална работа

Основното јавно обвинителство Прилеп побара мерка притвор до 30 дена за осомничениот, кој вчера околу 14,00 часот вооружен влегол во просториите на Центарот за социјална работа во Прилеп, пукал и повредил социјален работник.

„До судијата е поднесен предлог за определување мерка притвор до 30 дена поради основани стравувања дека осомничениот ќе бега и ќе влијае на сведоците, како и поради ризик од повторување на кривичното дело“, нагласи јавниот обвинител Стевчо Биноски.

И денеска е издадена наредба за спроведување на истражна постапка за две кривични дела.

Биноски нагласи дека е потребна истражна постапка за кривичното дело убиство во обид од член 123 ст.2 во врска со член 19 од Кривичниот законик, како и за кривичното дело неовластено поседување оружје од член 396 став 3 во врска со став 1.