Принцезата која на таванот го има единствениот Караваџо на светот ја исфрлаат од вилата: “Тука живеам 20 години, не одам никаде”
Во Италија, во тек е правна битка за имотот во Рим каде се наоѓа вилата со единствената таванска фреска на Караваџо
Принцезата, која живее во вила во Рим, која ја вклучува единствената фреска на таванот некогаш насликана од Караваџо, рече дека „силно ќе го брани“ своето право да остане во големиот имот откако судијата ќе нареди нејзино иселување.
Принцезата Рита Бонкомпањи Лудовизи (Rita Boncompagni Ludovisi), родена во САД, единствениот станар на вилата Аурора од 16 век, беше вмешана во долготраен спор за наследување со тројцата синови на нејзиниот покоен сопруг, принцот Никола Бонкомпањи Лудовиси (Nicola Boncompagni Ludovisi), кој беше последниот сопственик на имотот. Во тестаментот, принцот, кој почина во 2018 година, и дал право на својата сопруга да остане на имотот до крајот на животот.
Доколку имотот се продаде, приходите ќе бидат поделени меѓу неа и неговите синови. Сепак, синовите го оспорија ова, што веднаш предизвика судски спор. Двете страни на крајот се согласија да ја стават куќата на продажба, но на принцезата и беше кажано да се ослободи во рок од 60 дена, исто како што вилата не успеа да привлече ниту еден потенцијален купувач на аукција по петти пат.
Судијата во Рим пресуди дека имотот, на кој е прикажана фреската „Јупитер, Нептун и Плутон“ на Караваџо насликана на таванот на мала соба на првиот кат, не бил соодветно одржуван откако се урна ѕид, што доведе до затворање на соседната улица, објави La Repubblica. Судијата ја обвини и принцезата дека организирала неовластено носење туристи, што таа го негираше.
– Имам намера силно да го бранам моето право да ја користам вилата – изјави принцезата Рита во интервју за Гардијан, додавајќи дека се труди да не биде огорчена.
Вилата Аурора, скриена зад високи ѕидови во центарот на Рим, беше достапна за јавноста дури во 2010 година, а беше отворена по реновирањето. До смртта на принцот Никол, вилата беше домаќин на студенти по историја и помали приватни турнеи. Принцезата Рита состави дигитална архива од 150.000 документи кои ја раскажуваат приказната за историјата што ја содржи овој дом, вклучувајќи ги и писмата од Марија Антоанета и Луј XVI.
Многу го сакав мојот сопруг, а тој ме сакаше мене – изјавила таа.
- Тука живеам 20 години и целото мое време и ресурси го посветив на оваа вила. Навистина не мораше да биде вака – вели Рита.
Гардијан пишува дека Вилата Аурора првпат била ставена на аукција во јануари минатата година со првична понуда од 471 милион евра, а цената главно се должи на необјавената вредност на фреската на Караваџо. Цената падна на 145 милиони евра за време на последната аукција, но сепак не успеа да привлече ниту една понуда.
Принцезата изјавува дека имало интерес, но луѓето „не сакале да влезат во тој хаос“. Следната аукција е планирана за април.
Бидејќи локацијата е заштитена од италијанското Министерство за култура, откако ќе се прифати понудата, државата ќе има можност да го купи имотот по истата цена. Виторио Сгарби, секретар на Министерството за култура, рече дека на принцезата Рита треба да и се дозволи да остане сопственик на имотот додека вилата не биде продадена.
