Путерот е поврзан со прерана смрт: Еве што да јадете наместо тоа

Замената на путерот со растителни масла како маслиново, масло од канола или пченкарно масло може значително да го намали ризикот од прерана смрт, според новото истражување објавено во списанието JAMA Internal Medicine.

Научниците ги анализирале прехранбените навики на повеќе од 221.000 возрасни лица во текот на 30 до 50 години и откриле дека високиот внес на путер е поврзан со поголем ризик од смртност. Во овој период евидентирани се повеќе од 50.000 смртни случаи, од кои повеќе од 12.000 се поради рак, а повеќе од 11.000 поради срцеви заболувања.

Луѓето кои консумирале најмногу путер имале 15 отсто поголем ризик од смрт од која било причина, додека оние со најголем внес на растителни масла имале 16 отсто помал ризик. Дневното зголемување на внесот на растително масло од само 10 грама е поврзано со 11 отсто помал ризик од смрт од рак и 6 отсто помал ризик од смрт од срцеви заболувања, пишува Independent.

Научниците проценуваат дека замената на 10 грама путер дневно со иста количина на растителни масла може да ја намали вкупната смртност – вклучувајќи го и ракот – за дури 17 проценти. Податоците беа собрани од неколку големи истражувања во САД, вклучително и Студијата за здравјето на медицинските сестри и студии водени од истражувачи од Медицинскиот факултет Харвард.