Путин: Нуклеарниот арсенал на Русија е 100 отсто модернизиран! Во изминатите пет години изградивме 49 воени бродови (фото)
Рускиот претседател Владимир Путин изјави дека стратешките нуклеарни сили продолжуваат да претставуваат клучен столб на националната безбедност на Руската Федерација, нагласувајќи дека нивната техничка модернизација достигна 100 проценти.
Ваквата изјава беше дадена на работната средба со раководството на Министерството за одбрана, посветена на актуелните прашања од одбранбената политика.
Меѓу нив се интерконтинентални балистички ракети (ICBM), нуклеарни подморници од новата генерација и стратешки бомбардери, што дополнително ја зајакнува позицијата на Русија како една од водечките нуклеарни сили во светот.
Според претседателот, современите технолошки стандарди и новата генерација на оружје и овозможуваат на Русија да обезбеди стабилна и сигурна одбрана во услови на растечка геополитичка тензија и зголемен притисок од Западот.
Експертите проценуваат дека постигнувањето 100% модернизација е голем стратешки чекор. Според податоците на Стокхолмскиот меѓународен институт за мировни истражувања (СИПРИ) за 2024 година, Русија има околу 4.300 нуклеарни боеви глави, од кои околу 1.600 се подготвени за итно распоредување.
Целосното технолошко обновување на рускиот „нуклеарен штит“ го рангира меѓу најнапредните системи во светот. Според некои параметри, особено во однос на воведувањето на хиперсонични технологии, Русија ги надминува дури и Соединетите Американски Држави.
Ова е особено значајно во светло на неодамнешните тестирања на НАТО во Источна Европа, како што објави Ројтерс на 8 април.
Вкупно 49 бродови се изградени за морнарицата на Руската Федерација во последните пет години, изјави рускиот претседател Владимир Путин за време на седницата за развојот на морнарицата во Санкт Петербург.
Според него, руските воени бродови мора да бидат способни да го решат целиот опсег на задачи поставени пред нив.
Путин прецизираше дека меѓу новоизградените бродови има четири стратешки нуклеарни подморници од класата „Бореј-А“, како и четири повеќенаменски подморници од класата „Јасен-М“. Тој нагласи дека современата геополитичка ситуација и технолошкиот развој бараат формирање на нов профил на руската морнарица, прилагоден на современите предизвици.
Претседателот додаде дека руската морнарица има клучна улога во зачувувањето на националната безбедност и дека оваа област е еден од приоритетите на државната политика.
Тој особено го истакна значењето на стратешките нуклеарни сили, оценувајќи дека тие претставуваат гаранција за безбедноста на Русија, додека уделот на модерната воена технологија во тие сили е 100 отсто.
Во овој контекст, да потсетиме дека руската морнарица моментално е активно ангажирана во „Специјалната воена операција“ во Украина. Бродовите на Црноморската флота редовно вршат ракетни напади врз воените цели на украинските сили, користејќи ракети „Калибар“, а некои дури беа уништени од украинските напади во координација со западните земји.
