Ракот на белите дробови не секогаш започнува со кашлица, еден симптом често се игнорира
Ракот на белите дробови најчесто се поврзува со симптоми како што се отежнато дишење и болка во градите, но еден знак често останува незабележан – долгорочен замор.
Во брзото темпо на секојдневниот живот, лесно е да се припише замор на стрес, недостаток на сон или општа исцрпеност. Но, ако чувствувате необјаснет замор кој трае долго, вреди да се обрне внимание. Хроничниот замор е еден од симптомите на ракот на белите дробови што пациентите често го пријавуваат, особено во подоцнежните фази на болеста.
Cancer Research UK истакнува дека отежнато дишење предизвикано од рак на белите дробови може да доведе до изразено чувство на исцрпеност. Покрај тоа, акумулацијата на течности во абдоминалната празнина може да го отежне дишењето, што дополнително го зголемува заморот, пренесува The Mirror.
Други симптоми на рак на белите дробови
Покрај необјаснетиот замор, Националната здравствена служба ги наведува и следните симптоми кои може да укажуваат на рак на белите дробови:
- Кашлица која не поминува по три недели
- Долготрајна кашлица која се влошува
- Рекурентни инфекции на респираторниот тракт
- Кашлање крв
- Болка во градите при дишење или кашлање
- Постојано останување без здив
- Губење на апетит или необјаснето губење на тежината
- Помалку познати симптоми вклучуваат промени во прстите како што се задебелување на врвовите, тешкотии при голтање и болка при голтање.
Кога да побарате медицинска помош?
Ако забележите некој од овие симптоми, важно е да побарате лекарска помош што е можно поскоро. Раната дијагноза ги зголемува шансите за успешен третман.
Повеќето случаи на рак на белите дробови се поврзани со пушењето, но и непушачите може да ја заболат оваа болест. Откажувањето од пушењето во секое време го намалува ризикот – по 12 години опаѓа за повеќе од 50 проценти, а по 15 речиси го достигнува нивото на непушач, според Националната здравствена служба.
Заедно со откажувањето од пушење, урамнотежената исхрана и редовното вежбање исто така помагаат да се намали ризикот. Националната здравствена служба препорачува 150 минути умерена активност неделно, како што се пешачење или возење велосипед и тренинзи за сила двапати неделно.
Не ги игнорирајте сигналите на вашето тело – ако почувствувате необјаснет замор или долготрајни симптоми, веднаш посетете лекар.
