Расте бројот на жртвите од страшниот земјотрес: Над 3.000 загинати во Мјанмар

Бројот на загинати во земјотресот што го погоди Мјанмар пред речиси една недела се искачи на 3.085 , објави денеска воената хунта што ја води земјата.

Во кусото соопштение, властите соопштија дека 4.715 лица се повредени, додека 341 лице се водат како исчезнати, пренесе Ројтерс.

Епицентарот на земјотресот со јачина од 7,7 степени според Рихтеровата скала бил во близина на Мандалај, вториот по големина град во Мјанмар.

Земјотресот урна илјадници згради, оштети патишта и уништи мостови во неколку региони.

Локалните медиуми објавија дека бројот на загинати е многу поголем од официјалните бројки, а поради нарушувањето на телекомуникациите и тешко достапните области, се очекува бројките да се зголемат.

Земјотресот е почувствуван и во Бангкок, каде се урна недовршена зграда.

Потрагата по преживеани продолжува во урнатините.

Во Бангкок загинаа 22 лица, а 35 се повредени, најмногу поради уривање на недовршен облакодер.